भांगरभूंय | प्रतिनिधी
पणजी, डियापीः शिक्षण संचालनालयान राज्यांत 9 आनी 10 डिसेंबराक मेगा अपार दीस मोहिमेची येसस्वी अंमलबाजवणी करून मुखेल शाळांतल्या 70 टक्के विद्यार्थ्यांची अपार आयडी (APAAR ID) नोंदणी पुराय केल्या. मेगा अपार दिसांनी सगल्या शाळांनी UDISE पोर्टलाचेर विद्यार्थ्यांची म्हायती अपडेट करप आनी अपार आयडी तयार करपाचें काम जालें.
मेगा अपार दीस मोहीम येसस्वी करपाक शिक्षण संचालक शैलेश झिंगडे, राज्य प्रकल्प संचालक आनी SCERT संचालक सरीता गाडगीळ हांणी संबंदीत अधिकाऱ्यांक आनी शिक्षकांक योग्य मार्गदर्शन केलें.
शिक्षण वेवस्थेत कार्यक्षमता आनी पारदर्शकता वाडोवपा खातीर अपार आयडी म्हत्वाची आशिल्ल्याचें सांगलें. हो उपक्रम ‘वन नेशन, वन स्टुडंट आयडी’ कार्यावळ आनी 2020 च्या राष्ट्रीय शिक्षण धोरण 2020 कडेन संलग्न आसा.
ऑटोमेटेड परमनंट ॲकेदमिक अकाउंट रजिस्ट्री (Automated Permanent Academic Account Registry) आयडी सिस्टीमच्या अंमलबजावणीतल्यान विद्यार्थ्यांची शाळांतली नांव नोंदणी, सगल्या विद्यार्थ्यांच्यो शिक्षणीक नोंदणी आनी हेर नोंदणी वेवस्थित दवरपा खातीर पोर्टल डिझायन केलां.
मेगा अपार दीस मोहिमेच्या एकाच दिसा अपार आयडी नोंदणी 25,100 वयल्यान 41,600 चेर पावली. दरेक झोनातल्यांन टॉप 20 शाळांनी 70 टक्क्या वयर अपार आयडी नोंदणी प्रक्रिया पुराय केल्या. राज्यांतल्या पुर्व प्राथमिक आनी प्राथमिक शाळांक 20 जानेवारी 2025 मेरेन आनी माध्यमिक शाळांक 15 जानेवारी मेरेन 70 टक्के अपार आयडी नोंदणी पुराय करपाचें उद्दीश्ट दिलां.
APAAR आयडी हो देशभरांतल्या शाळांनी नोंदणी केल्ल्या दरेक विद्यार्थ्यांक दिल्लो 12-अंकी वळख क्रमांक आसा. हो आयडी विद्यार्थ्यांच्या शिक्षणीक उदरगतीची म्हायती नोंद करपाक डिजिटल लॉकर म्हणून काम करता, जातूंत परिक्षेचो निकाल, प्रमाणपत्रां आनी हेर म्हायती आनी दाखल्यांची नोंद आसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
