70 वर्सां उपरांत नामिबियांतल्यान आठ चित्ते भारतांत दाखल

भांगरभूंय | प्रतिनिधी

रधानमंत्री नरेंद्र मोदी हांच्या वाडदिसा निमतान सोडले कुनो अभयारण्यांत

नवी दिल्लीः वट्ट सात दसकां उपरांत म्हणल्यार 70 वर्सां उपरांत भारतांत चित्ते दाखल जाल्यात. नामिबियांतल्यान हाडिल्ले आठ चित्ते प्रधानमंत्री नरेंद्र मोदी हांचे हस्तुकीं कुनो अभयारण्यांत सोडले. ह्या 8 चित्त्यां मदीं 5 मादी आनी 3 नर आसात. आठ चित्त्यांक घेवन नामिबियांतल्यान विशेश विमान 20 वरांत 8 हजार किमि.चो प्रवास करून ग्वाल्हेर विमानतळार दाखल जाले. ते उपरांत प्रधानमंत्री नरेंद्र मोदी हांणी तांच्या 72व्या वाडदिसा निमतान ह्या चित्त्यांक सुरक्षीत कुनो अभयारण्यांत सोडले.

1952 वर्सा भारतांतल्यान चित्ते ना जाल्ले. सर्वोच्च न्यायालयान 2020 वर्सा भारतांत चित्ते हाडपाची परवानगी दिल्ली. भारतांतल्यान चित्ते ना जाले उपरांत 1970 वर्सा देशांत हाडपा खातीर आदल्यो प्रधानमंत्री इंदिरा गांधी हांणी यत्न केल्ले. मात तेन्ना सर्वोच्च न्यायालयान हे खातीर परवानगी न्हयकारिल्ली. ते उपरांत अंदूं 2022त प्रधानमंत्री नरेंद्र मोदी हांच्या फुडारपणा खाला ‘प्रोजेक्ट चित्ता’ पुराय जाला. ह्या ‘प्रोजेक्ट चित्ता’ खातीर भारत सरकारान सुमार 90 ते 92 कोटी रुपया खर्च केल्ल्याची म्हायती मेळ्ळ्या.

कुनो अभयारण्यांत चित्त्यां खातीर विशेश वेवस्था
कुनो राष्ट्रीय अभयारण्यांत चित्त्यां खातीर विशेश वेवस्था केल्या. ह्या चित्त्यांक एक म्हयनो क्वारंटायनांत दवरतले. कुनो नॅशनल पार्क हे 748 चौखण किमि. पातळिल्लें संरक्षीत क्षेत्र आसा. ह्या अभयारण्यांत चित्त्यां खातीर 12 किमि. लांबायेची राखणे वणत उबारल्या. चित्त्यांक सुरवातीक अधिवासांत दवरतले.भारतांत हाडिल्ल्या चित्त्यां मुखार कांय आव्हानां आसतलीं. चित्त्यांक भारतांतल्या वातावरणा कडेन जुळोवन घेवचे पडटले. सध्या तांकां 24 वरा देखरेखी खाला तशेंच 12 किमि.च्या अधिवासांत विलगीकरणांत दवरतले. ह्या चित्त्यांक हांगाच्या प्राण्यांची कास करची पडटली. भारतांत आसपी हरीण आफ्रिकेंत ना. ताका लागून ह्या प्राण्याची कास करप चित्त्यांक जमतले, हो प्रस्न आसा. ते खातीर तांकां निरिक्षणा खाला दवरल्या.