भांगरभूंय | प्रतिनिधी
पणजीः गोंयांतल्या विवीध खणींनी हे आदीं काडून दवरिल्ल्या 7.56 लाख मॅट्रीक टन मिनाची ई पावणी जातली. अशे तरेची ही 30 वी पावणी आसा. खण खात्यान हे विशींची सुचोवणी जारी केल्या.
मिनाच्या दर्जा प्रमाण 5 लॉट केल्यात. हाचें मोल लॉटा प्रमाण 895 रुपया ते 1,680 रुपया आसा. पावणेंतल्यान सरकाराक सुमार 85 कोटी रुपयांचो महसूल मेळपाची अपेक्षा आसा.
मिनाची पावणी एमएसटीसीच्या संकेत थळा वयल्यान ऑनलायन पद्दतीन करतले. मीन आसा ते स्थितींत आनी आसा थंय पद्दतीन पावणी करतले. फक्त अंतीम वापर करपी वा निर्गत करपी पावणेंत वांटो घेवपाक शकतात. निर्गत करप्यान बोली जिखल्यार तो फक्त एकदाच अंतीम वापर करप्याक वा हेर निर्गत करप्याक विकपाक शकता. अंतीम वापर करपी हें मीन निर्गत करपाक शकचो ना, अशें खण खात्याचे सुचोवणेंत स्पश्ट केलां. पावणी प्रक्रिया 23 सप्टेंबराच्यान सुरू जातली. पावणी जिखप्याक 90 दिसां भितर मीन उखलचें पडटलें. अशें करूंक ना जाल्यार मीन आनी पावणे खातीर दिल्ली रकम जप्त करतले. मीन जेटीचेर आसल्यार 90 दिसां भितर तें थंयच्यान दुसरे कडेन व्हरचें पडटलें. एके सुवाते वयल्यान दुसरे सुवातेर मीन व्हरतना खण खात्या कडल्यान गरजेचे ते परवाने घेवचे पडटले. बोली जिखप्यान 40 दिसां भितर पुराय पयशे दिलें ना जाल्यार अनामत रकम जप्त करतले, अशेंय खण खात्यान स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
