भांगरभूंय | प्रतिनिधी
गोंय ऑनलायन पोर्टलाचेर घेतली सेवा
पणजी: गोंय सरकारी विवीध सेवा, परवाने, प्रमाणपत्रां, बील भरप सुटसुटीत करपा खातीर तशेंच हे प्रक्रियेंत पारदर्शकताय येवपा खातीर सुरू केल्ल्या गोंय ऑनलायन ह्या पोर्टलाक गोंयच्यान बरो प्रतिसाद मेळटा. 2019 सावन ते 15 फेब्रुवारी 2025 मेरेन ह्या पोर्टला वरवीं 7 लाख 33 हजार 119 नागरिकांनी ऑनलायन पद्दतीन रहिवासी दाखलो मेळयला. तशेंच पोर्टला वरवीं हेर ऑनलायन सेवा घेवपाचें प्रमाण लेगीत वाडलां.
मेळिल्ले म्हायती प्रमाण गोंय ऑनलायन पोर्टलाचेर महसूल खात्याच्या सेवा सगल्यांत चड प्रमाणांत घेतल्यात. हातूंत रहिवासी दाखल्या उपरांत जात प्रमाणपत्र (1.82 लाख), डिजिटल सर्वे आराखडो (68 हजार), विचलन प्रमाणपत्र (54 हजार), उत्पन्न दाखलो (54 हजार), अधिवास प्रमाणपत्र (3590), सनद (2214), मॅटीझ प्रमाणपत्र (3073), ध्वनी परवानो (462), जमीन विभागणी (43) ह्यो सेवा पोर्टला वेल्यान घेतल्यात.
महसूल खात्या उपरांत राज्य निबंधक विभागा कडल्यान सगल्यांत चड सेवा घेतल्यात. ह्या विभागांत सगल्यांत चड जल्म नोंदणी प्रमाणपत्र घेतल्यात. आतां मेरेन 3 लाख 13 हजार 226 जाणांनी ऑनलायन पद्दतीन जल्म दाखलो घेतला. हे सगले दाखले 1914 ते 1970 मजगतीं जल्मल्ल्या व्यक्तींचे आशिल्ले. जाल्यार ह्याच काळा खातीर 6247 नागरिकांनी मरण आयिल्ल्याचो दाखलो घेतला. तशेंच ह्या विभागा कडल्यान जल्म दाखल्यात बदल (810), मरण दाखल्यात बदल (22) ह्यो सेवाय घेतल्यात.
भलायकी खात्या खाला येवपी डीडीएसएसवाय येवजणेच्या नुतनीकरणा खातीर 2 लाख 65 हजार 68 लोकांनी गोंय ऑनलायन पोर्टलाचो वापर केला. तशेंच 2 लाख 44 हजार 566 जाणांक कामगार वा रोजगार कार्ड, सुमार 10 हजार दुकान नोंदणी प्रमाणपत्र, 52 हजार 522 जाणांक दुकान नोंदणी नुतनीकरण, 13 हजार 442 जाणांक हॉटेल वा होम स्टे खातीरचें नोंदणी प्रमाणपत्र, 13 हजार 226 जाणांक उजो पालोवपी दळाचे हरकत ना नुतनीकरण प्रमाणपत्र हे गोंय ऑनलायन पोर्टला वेल्यान दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
