भांगरभूंय | प्रतिनिधी
पणजी : आखाती (गल्फ) देशांनी सात हजार गोंयकारांनी स्थलांतर केलां आनी स देशांनी ते काम करतात. गोंयकारा सयत हेर देशांतल्या स्थलांतर केल्ल्या भारतीयांक आखाती देशांनी सुरक्षा आनी भलायकी दिवपा खातीर भारत सरकारान विविध येवजण्यो चालीक लायल्यात, अशी म्हायती केंद्रीय परराष्ट्र वेव्हार राज्य मंत्री किर्ती वर्धन सिंह हांणी दिली.
राज्यसभेच्या पटलार लेखी जाप दितना किर्ती वर्धन सिंह हांणी सांगलें, आखाती देशांनी भारतीय सुरक्षा, राखण आनी भलयाकी दिवपा खातीर भारत सरकार उच्च प्राधान्य दिता. सरकारान विविध उपक्रम, देखीक प्रवासी भारतीय विमो येवजण आनी स्थलांतर जावचे पयलीची दिशा आनी प्रशिक्षण चालीक लायता. जाका लागून स्थलांतरीत जाल्लो भारतीय कामगाराक सुरक्षीत तरेन स्थलांतर जावपाक मजत जातली, भायल्या राज्यांत वेवस्थीत रावपाची आनी काम करपाची सुविधा मेळटली तशेंच तांकां तांचे हक्क आनी सरकाराच्या विविध कल्याणकारी येवजण्यांची म्हायती मेळटली.
2006-07 ते जून 2025 मेरेन प्रवासी भारतीय विमो येवजणे खाला 83.88 लाख भारतीय नोंद जाल्यात आनी हातूंत 7087 गोंयकार आसात. ओमान, कतार, कुवेट, सावदी अरेबिया, बाहरीन आनी संयुक्त अरब आमिरात (यूएई) ह्या देशांत गोंयकारांनी कामां खातीर स्थलांतर केलां. हाचे भायर थंय केरळ आनी हेर कडलेय हजारांनी भारतीय आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
