भांगरभूंय | प्रतिनिधी
दिल्ली भोंवडे विशीं भौशीक बांदकाम मंत्री दिगंबर कामत हांची म्हायती
पणजीः दिल्ली भोंवडे वेळार कैंद्रीय येरादारी मंत्री नितीन गडकरी हांणी राज्यांत ७ हजार कोटींच्या ५ प्रकल्पांक मान्यताय दिल्या. राज्यांत आतां मेरेन ३० हजार कोटींचीं महामार्गाचीं कामां चालीक लागल्यांत. ते भायर राज्यांतल्या पुलांचें, साकवांचें तशेंच इमारतींचें बेगीनूच ओडीट जातलें, अशी म्हायती भौशीक बांदकाम मंत्री दिगंबर कामत हांणी दिली.
भौशीक बांदकाम खात्याचे कारभार आनी फायलीचे डिजीटल स्वाक्षरी करपी इ-सायन मोड्यूल हे सोफ्टवेअर प्रणालीचें मंगळारा पणजे आल्तिन भौशीक बांदकाम खात्याच्या मुख्यालयांत मंत्री दिगंबर कामत हस्तुकीं उक्तावण जालें. उक्तावणा उपरांत कामत उलयताले. ह्या वेळार भौशीक बांदकाम खात्याचे प्रधान मुखेल अभियंते उत्तम पार्सेकार आनी हेर अधिकारी हाजीर आशिल्ले.
भौशीक बांदकाम खात्याचो मंत्री जाले उपरांत पयलीं फोंडकुलां भरपाचें काम हांवें हातांत घेतलें आनी मागीर दिल्ली भोंवडेर गेलों. म्हजी दिल्ली भोंवडे वल्यान खुपशी चर्चा जाली. मात हे भोंवडेंत हांवें विवीध मंत्र्यां वांगडा, अधिकार्यां वांगडा बसका घेतली, अशें कामत हांणी म्हणलें.
केंद्रीय रस्ते येरादारी मंत्री नितिन गडकरी हांचे बसकेंत राज्यांक ७०७६ कोटी रुपयांच्या ५ प्रकल्पांक मान्यताय दिल्या. हातूंत राष्ट्रीय महामार्ग ६६ कुंकळ्ळी बायपास १९३८ कोटी, जोड रस्त्या सयत नवो बोरी पुल १२३५ कोटी, गोंय-कर्नाटक शिमेर मोल्यां वाठारांत म्हामार्गाचें चौपदरीकरण २२९७ कोटी, मोल्यां ते खांडेपार जंक्शनाचें चौपदीकरण १००६ कोटी आनी ६०० कोटी खर्चून आर्ले इस्टर्न बायपासचें चौपदीकरण ह्या प्रकल्पांचो आसपाव आसा, अशी म्हायती कामत हांणी दिली.
ते भायर केंद्रीय रेल्वे मंत्री आश्विनी वैष्णव हांची भेट घेवन विवीध रेल्वे क्रॉसिंगा वयर उड्डाण पुल बांदपा खातीर ना हरकत दाखलो दिवपा विशींचेर चर्चा जाली. ह्या वेळार रेल्वे मंत्र्यान संबंदीत अधिकार्यांक निर्देश दिवन खासा करून मडगांव रिंग रोड वशीं आडकून आशिल्ल्या विशयां कडेन लक्ष दिवपाक सांगलां, अशें कामत हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
