भांगरभूंय | प्रतिनिधी
केंद्र सरकारान जाहीर केलें वर्सुकी सर्वेक्षण
नवी दिल्ली, खबरां संस्था ः देशांत नोटबंदी, जीएसटी कायदो चालीक लावप आनी कोरोनाक लागून देशांत सात वर्सांत 37 लाख ल्हान उद्देग आनी वेवसाय बंद जाल्यात. ह्या कारणाक लागून तातूंत काम करपी सुमार 1 कोटी 34 लाख लोक बेरोजगार जाल्यात. सरकारान जाहीर केल्ल्या म्हायतीच्या विश्लेशणा वयल्यान हो धक्को दिवपी आंकडो मेळ्ळा. हो आंकडो उत्पादन, वेपार आनी सेवा क्षेत्रा कडेन संबंदीत ल्हान असंघटीत युनिट वा ल्हान वेवसायांत आशिल्ल्या लोकांचो आसा. फकत उत्पादन क्षेत्रांत अशे 18 लाख युनिट बंद जाल्ल्यान 54 लाख लोक बेरोजगार जाल्यात.
असंघटीत क्षेत्रांत 54 लाख लोक बेरोजगार
ऑक्टोबर 2022 ते सप्टेंबर 2023 ह्या काळांत देशांतल्या उत्पादन क्षेत्रांत सुमार 17.82 कोटी असंघटीत युनिट काम करताले. जुलय 2015 ते जून 2016 त तांचो आंकडो 19.70 कोटी आशिल्लो. हाचो अर्थ सात वर्सांत सुमार 9.3 टक्के युनिट बंद जाल्यात अशें सूत्रांनी सांगलें.
2015-16 वर्सा 3.60 कोटी लोक उत्पादन क्षेत्रांत काम करताले. 2022-23 वर्सा तांचो आंकडो 3.06 कोटी मेरेन देंविल्लो. म्हणल्यार ह्या क्षेत्रांत 54 लाख लोक बेरोजगार जाल्यात. केंद्र सरकाराच्या सांख्यिकी आनी कार्यावळीची अंमलबजावणी मंत्रालयान 2021-22 आनी 2022-23 वर्साचो वर्सुकी सर्वेक्षण ( Annual Survey Of Unincorporated Sector Enterprises – ASUSE ) अहवाल जाहीर केला. राष्ट्रीय सांख्यिकी कार्यालयान (NSO) 2015-16 वर्साचो 73 वे फेरयेचो सर्वेक्षण अहवाल जाहीर केला. तातूंत दिल्ले आंकडेवारीची तुळा केल्यार बेरोजगारीचे हें प्रमाण हुस्को करपा सारकें आसा.
कॉर्पोरेट मळाक धपको
एनएसएसच्या 67व्या आनी 73व्या फेरयेच्या सर्वेक्षण अहवालांतल्या आंकड्यांची आनी ASUSE 2021-22 आनी 2022-23 च्या आंकड्यांची तुळा केल्यार नोटबंदी, जीएसटी आनी कोविड लॉकडावनाचो कॉर्पोरेट मळाचेर व्हड परिणाम जाला अशें दिसून येता. 2015-16 ते 2021-22 ह्या काळांत युनिटांचो आंकडो 30 लाखां परस चड उणो जालो आनी तातूंत काम करपी लोकांचो आंकडो 1.30 कोटी उणो जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
