भांगरभूंय | प्रतिनिधी
भौशीक बांदकाम खात्यांत सावळो गोंदळ
पणजी: भौशीक बांदकाम खात्याचे (पीडब्ल्यूडी) 65 वरिश्ठ अधिकार्यां मदीं फक्त 14 जाण नियमीत कार्यरत आसात. जाल्यार प्रधान मुख्य अभियंत्याचो अतिरिक्त ताबो हंगामी अभियंत्या कडेन दिला. तशेंच हेर वरिश्ठ पदार हंगामी पद्दतीन बडटी दिवन खात्याचें कामकाज सुरू आशिल्ल्याची धक्को दिवपी म्हायती मुखार आयल्या.
मेळिल्ले म्हायती प्रमाण, पीडब्ल्यूडींत एक प्रधान मुखेल अभियंतो, पांच मुखेल अभियंते, 13 अधिक्षक आनी 46 कार्यकारी अभियंते अशीं 65 पदां मंजूर जाल्यांत. हंगामी पद्दतीन बडटी दिल्ले अधिकारी मुखेल अभियंताेपदाचें कामकाज पळयतात. ह्या अधिकाऱ्यांक हालींच 15 ऑक्टोबर 2025 दिसा हंगामी पद्दतीन मुखेल अभियंतो पदार बडटी दिल्या. हातूंत संदीप चोडणेकार, विश्वंबर भेंडे आनी दत्तप्रसाद कामत हांचो आस्पाव आसा. हातूंत संदीप चोडणेकार हांचे कडेन प्रधान मुखेल अभियंत्याचो ताबो दिला.
मजगतीं, वयले अधिकारी नियमीत अधिक्षक अभियंते आसात. तांकां हंगामी पद्दतीन मुखेल अभियंपापदार बडटी दिवन खात्याचें कामकाज सुरू दवरलां. तशेंच अधिक्षक अभियंतो पदार 8 अधिकाऱ्यांक हंगामी पद्दतीन बडटी दिल्या. हातूंत संजय गावडे, प्रदीप गावडे, सुनील गावडे, नारायण तिवरेकार, स्वप्नील देसाय, लेस्टर डिसोझा, जुड कार्व्हालो आनी आर्मस्ट्राँग फर्नांडीस हांचो आस्पाव आसा. हे अधिकारी नियमीत कार्यकारी अभियंते आसात.
तशेंच संदीप गावडे, वॅनिसियो डिकोस्टा आनी विन्सेंट डिसोझा हे तीन अधिकारी नियमीत कार्यकारी अभियंतोपदार कार्यरत आसात. हातूंत वॅनिसियो आनी विन्सेंट हे दोगूय अधिकारी 1 एप्रील 2026 दिसा निवृत्त जातले.
मजगतीं, कार्यकारी अभियंतोपदार 44 अधिकाऱ्यांक हंगामी पद्दतीन बडटी दिल्या. हे अधिकारी नियमीत सहाय्यक अभियंतो आसात. वयले अधिकारी सिव्हील गटांतले आसात. वयल्या पदाची संख्या 65 मंजूर जाल्या. खात्यांतल्या वयल्या पदाचें कामकाज हंगामी पद्दतीन सुरू आशिल्ल्यान खूबशा अधिकाऱ्यांचो बडटे खातीर लागपी सेवा काळ पुराय जायना. ताका लागून तांकां बडटे पसून वंचीत रावचें पडटा. ताका लागून खात्यांत अधिकाऱ्यां मदीं निरशेवणी पातळ्ळ्या.
ह्या प्रकरणांत कांय अधिकाऱ्यांनी मुंबय उच्च न्यायालयाच्या गोंय खंडपिठांत याचिका दाखल केल्या. तशेंच भौशीक बांदकाम खात्यांत मॅकानिकल वा इलेक्ट्रिकल गटाचे अभियंते आसात. तातूंत अधिक्षक अभियंत्याचीं दोन पदां आनी कार्यकारी अभियंत्याचीं पांच पदां मंजूर जाल्यांत.
– कार्यकारी अभियंतोपदार बडटे खातीर पदवी प्राप्त सहाय्यक अभियंत्याक 8 वर्सांचो सेवा काळ पुराय करचो पडटा. जाल्यार डिप्लोमा प्राप्त सहाय्यक अभियंत्याक 12 वर्सांचो सेवा काळ पुराय करचो पडटा.
– अधिक्षक अभियंतोपदार बडटे खातीर कार्यकारी अभियंत्याक पांच वर्सांचो सेवा काळ पुराय करचो पडटा.
– मुखेल अभियंतोपदार बडटे खातीर अधिक्षक अभियंत्याक पांच वर्सांचो सेवा काळ पुराय करचो पडटा.
– हंगामी पद्दतीन बडटी मेळिल्ल्या अधिकाऱ्याक हो काळ बडटे खातीर ग्राह्य धरिनात. ताका लागून गरजेचो सेवा काळ पुराय जावंक नाशिल्ल्यान वरिश्ठ पदार नियमीत बडटी मेळना. ताका लागून अधिकारी हताश जाल्ल्याचें खाजगींत उलयतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
