भांगरभूंय | प्रतिनिधी
खेळां फाट्यांत जो भागी जाता ताका गोंय सरकारान गुण मेळोवपाची संद दिल्या, अशें आसुनूय बी सगळे ह्या धोरणाचो काय कारणांक लागून लाव घेवं शकना, हांचें एक कारण म्हळ्यार सगळ्यांक खेळ जमताच अशें ना. खेळां भितर मैदानी आनी चार वण्टींतले खेळ अशे दोन प्रकार आसतात. कांय जाणांक मैदानी खेळ जमताच अशें ना तांणी चार वण्टीं भितरले खेळ जरूर आपणावचे, कारण खेळांत जिखचे परस तातूंत वांटेकार जावप महत्वाचें आसता. सध्या चेन्नयचो आर. प्रज्ञानन्द हाचें नांव आनी बुद्दिबळाची सर्त चड लोकप्रीय जाल्या. तसो बुद्दीबळ हो भारतीय खेळ. हाका व्हड इतिहास आसा. ताका चतुरंग म्हूण आदीं वळखताले. पावस जावं गीम, वर्साचे 365 दीस हो खेळ खेळपाक जाता तेन्ना ह्या खेळाचे सर्तींत जरूर भाग घेवचो. ह्या खेळांक पिरायेची अट ना आनी तो खंयूय खेळपाक मेळटा.
नॉर्वेचो खेळगडो मॅग्नस कार्लसन सद्या संवसारांतलो पयल्या क्रमांकाचो खेळगडी जावन आसा. अमेरिकेचो आक्रमक खेळगडो फेबिआनो करुआना… हीं नांवां तुमच्या कानार गेल्यां आसतलीं. संवसारीक सर्त हाचे पयलीं विश्वनाथन आनंद हाणें जिखिल्ली, पूण चेन्नयच्या प्रज्ञानंदाची तुस्त चड जाता. तसो हो खेळ बुद्दीक चालना दिवपी. तुमी योग्य निर्णय कशे घेतात ? हाचेर जैत निंबून आसता. घोडे, हती, वजीर, उंट, राजा सोंगटी ना जाल्यार प्यादी घेवन तुमी रणनीती आखतात. काळे, धवे रंग आशिल्ल्या ह्या खेळाक संयम जाय पडटा. एक मात खरें, हो खेळ कोणूय खेळूं शकता. पूण मार्गदर्शन आनी सराव मात जाय. एका वेळार सोवियत खेळगड्यांचें ह्या खेळाचेर वर्चस्व आशिल्लें. तो तांचो राष्ट्रीय खेळ म्हूण आसत, पूण हो खेळ भारताचो म्हणटकच ह्या खेळान आमचें वस्तादपण आसूंक जाय. रामायण, महाभारत काळा सावन हो खेळ परिचित आसा. आतां तर ह्या खेळाच्यो सर्ती जातात. गोंयांत ताची संघटना लेगीत आसा. ताचें संकेतथळ लेगीत आसा. अनुराग म्हामल भक्ती कुलकर्णी सारकीं नांवां ह्या खेळांत लोकप्रीय आसात, जी तुम्ही आयकल्या आसतलींच. ह्या खेळाचें मार्गदर्शन गोंयांतल्या तशेंच गोंया भायल्या नामनेच्या अधिकृत मार्गदर्शकां कडल्यान आॅनयन लेगीत मेळपाची सोय आसा. तशेंच तुमच्या संगणकाचेर लेगीत खेळपाची सुविधा आसा.
तर्कशास्त्र तशेंच बुद्दीमत्ता वाडोवपी हो खेळ ल्हान पिराये सावन खेळपाक सुरु करचो. खंयच्याय फाट्यांचो कोणूय भुरगो ह्या खेळांत वांटेकार जावं शकता. आतां तुमी सर्तीन वाटो घेवन ग्रॅण्डमास्टर जावपाची सपनां पळोवंक शकतात. ह्या अधिकृत गोंयच्या मार्गदर्शकां कडे तुमी संपर्क सादूं शकतात. अविनाश मालवणकार 9850271759, स्वप्नील होबळे 988177668, संजय कवळेंकार ९823258711, व्ही शिवस्वामी 9422639000, सौ प्रसन्ना स्वामी 9890218971, फ्रेडरिक कुलासो 9623815392, अमोघ नमशीकार 9422455896, व्हिल्सन क्रूझ 9764185747, प्रकाश इन्सुलकार 9822158299, गौतम तारी 9923422512. ह्या खेळान हेर खेळां सारको सातत्यान सराव करप गरजेचो. गोंयान पद्मनाभन सारक्यांची बुद्धीमान खेळगड्याची गरज आसा. तांकां पालकांनी मजत करपाक जाय. अनुराग म्हामल, लिओन मेंडोसा, भक्ती कुलकर्णी, इथन वाझ, नितीश बेलुरकार, अमेय अवदी, ऋत्विक परब सारकीं नांवां नदरे फुडें येतात. तांचे भितर ग्रॅण्डमास्टर जाल्ले आसात. तर थोड्यां मदीं ग्रँडमास्टर लिपल्यात. तांकां जर फाव ती संद दिली तर जरूर ताचो लाव जातलो. जिनो फार्मास्युटिकल सारकीं आस्थापनां खेळगड्यांक सदांच प्रोत्साहन दितात. आपल्या भुरग्यांनी लेगीत ह्या खेळांत रस दाखोवन खेळां मळार आपलें नांव वयर काडचें. वयर दिल्ले अधिकृत मार्गदर्शक आसाच, खेरीज तुमचो शाळेंतले शिक्षक तुमकां फाव तें मार्गदर्शन जरूर दितले. ह्या खेळान सांगिल्ले त्या प्रमाण सराव म्हत्वाचो आसता, पूण अणभवी मार्गदर्शकां कडल्यान तो खेळ चड बरो जावं येता. गोंयान, गोंया भायर, देशा भायर जायत्यो सर्ती जातात. तातूंत तुमी वांटेकार जावं शकतात.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
