भांगरभूंय | प्रतिनिधी
30 शिक्षकांनी न्हयकारलो प्रस्ताव
पणजी: शिक्षण खात्यान ज्या 90 मुळाव्या शिक्षकांक विद्यालयांत सहाय्यक शिक्षक म्हूण बडटी दिवपाचो निर्णय घेतिल्लो, तातूंतल्या 60 शिक्षकांनी प्रस्ताव स्विकारलो जाल्यार 30 शिक्षकांनी बडटे खातीरच्या प्रस्तावाक न्हयकार दिलो अशी म्हायती शिक्षण संचालक शैलेश झिंगडे हांणी आयतारा ‘भांगरभूंय’ कडेन उलयतना दिली.
शिक्षण खात्या वतीन मुळाव्या शिक्षकांक टप्प्याटप्प्यान विद्यालयांत सहाय्यक शिक्षक म्हूण बडटी दितात. खूबशा वर्सां उपरांत खात्यान अंदूं 90 मुळाव्या शिक्षकांक अशे तरेन बडटी दिवपाचो निर्णय घेतिल्लो. ते विशींचो प्रस्ताव लेगीत ह्या शिक्षकांक धाडिल्लो. पूण तातूंतल्या 60 शिक्षकांनी प्रस्ताव स्विकारलो. उरिल्ल्या 30 शिक्षकांनी मात ह्या प्रस्तावाक न्हयकार दिल्ल्याचें झिंगडे हांणी सांगलें.
सरकारी विद्यालयांत फावोशे शिक्षक उपलब्ध जावचे ह्या हेतान मुळाव्या शिक्षकां मदल्यान कांय शिक्षकांची विद्यालयांनी सहाय्यक शिक्षक म्हूण नेमणूक करपाचें धोरण राज्य सरकारा कडल्यान फाटल्या खूबशा वर्सां सावन आपणायतात. ह्या धोरणाची कांय वर्सां सावन अंमलबजावणी जावंक नाशिल्ली. अंदूं मात सरकारान ह्या धोरणाची अंमलबजावणी करून 90 मुळाव्या शिक्षकांक विद्यालयांनी सहाय्यक शिक्षक म्हूण बडटी दिवपाचो निर्णय घेतिल्लो.
————-
ह्या गजालींक लागून मेळटा न्हयकार
* शिक्षण खात्या कडल्यान ज्या मुळाव्या शिक्षकांक विद्यालयांनी सहाय्यक शिक्षकपदाचो प्रस्ताव दितात तातूंतल्या चडशा जाणांक मुळावे शाळेंत मुख्याध्यापक जावपाची आस्त आसता. अशा शिक्षकां कडल्यान ह्या प्रस्तावाक न्हयकार मेळटा.
* मुळावे शिक्षक म्हूण खूबशीं वर्सां सेवा दिल्ल्यांक विद्यालयांतलें सहाय्यक शिक्षकपद ज्येश्ठते प्रमाण उणाक दिसता. ताका लागूनय खूबशा मुळाव्या शिक्षकां कडल्यान सहाय्यक शिक्षकपद स्विकारपाक न्हयकार मेळटा, अशें शिक्षण मळा वेल्या एका तज्ञान ‘भांगरभूंय’ कडेन उलयतना सांगलें.
व्होकेशनल शिक्षक मुख्याध्यापक, प्रचार्य जावंक शकनात: न्यायालय
वेवसायीक विभागाचो (व्होकेशनल) शिक्षक शाळेचो मुख्याध्यापक वा प्राचार्य जावंक शकनाशिल्ल्याचो निवाडो हालींच उच्च न्यायालयान दिला. ताका लागून मुख्याध्यापक वा प्राचार्य जावपाचें सपन आशिल्ल्या व्होकेशनल विभागाच्या शिक्षकां मदीं निरशेवणी पातळ्ळ्या. दिवचलच्या शांतादुर्गा उच्च माध्यमीक विद्यालयाच्या व्होकेशनल विभागाच्या एका ज्येश्ठ शिक्षकान हे विशीं उच्च न्यायालयांत याचिका दाखल केल्ली. ताचेर तीन न्यायाधिशांच्या खंडपिठान व्होकेशनल विभागाचे शिक्षक मुख्याध्यापक वा प्राचार्य म्हूण पदोन्नती खातीर पात्र नाशिल्ल्याचो निवाडो दिला. ह्या विभागाच्या शिक्षकांची मुख्याध्यापक वा प्राचार्यपदार नेमणूक जावपा खातीर कायदो आनी नेमां मदीं दुरुस्ती होच पर्याय आशिल्ल्याचेंय न्यायालयान स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
