भांगरभूंय | प्रतिनिधी
खबरां संस्था
ब्रिस्टोलः बायलांचे वन-डे माळेंतले पयले मॅचींत इंग्लंडान ऑस्ट्रेलियेक 2 विकेटींनी हारयलें. बुधवारा जाल्ले हे उमळीक वाडोवपी मॅचींत ऑस्ट्रेलियेच्या पंगडान जैता खातीर इंग्लंडाक 264 धांवड्यांचे लक्ष्य दिल्लें. तांणी ते 48.1 ओव्हरींत हातासलें. वन-डे मॅचींत इंग्लंडान व्हो सगल्यांच चड धांवड्यांचो फाटलाव आसा. इंग्लंडाचें कॅप्टन हिथर नायटान 75 धांवड्यांची नाबाद खेळी केली. तें प्लेयर ऑफ दी मॅच थारलें.
पयले वन-डेंत जैत मेळोवन इंग्लंडान अॅशेजचे मल्टी फॉर्मेट सिरीजांत 6-6 अशी गुण बोरोबोरी केल्या. वन-डे माळेंतल्या दोन मॅची बाकी आसात. इंग्लंडान 1-0 अशी आघाडी घेतल्या.
इंग्लंड पंगड वन-डे मॅचींत ऑस्ट्रेलियेक 6 वर्सा उपरांत हारोवपाक येसस्वी थारलो. तांणी 29 ऑक्टोबर 2017 दिसा ऑस्ट्रेलियेक हारयल्लें. ते उपरांतचे तांचें हें पयलें जैत आसा. ताचे पयली दोनूय पंगडांत 8 वन-डे मॅची जाल्ल्यो आनी त्यो सगल्यो ऑस्ट्रेलियेन जिखल्ल्यो. ऑस्ट्रेलियन पंगडान दोन वर्सां उपरांत एक पंगडा कडल्यान ही हार घेतल्या. हाचे पयलीं 2021 वर्सा भारतीय पंगडान तांकां 2 विकेटींनी हारयल्ले. ते उपरांत जाल्ले 15 वन-डेंत भारताक तांणी हारयल्लें.
टॉस जिखून पयलीं खेळपी ऑस्ट्रेलियेच्यो 8 धांवड्यो जाल्ल्यो तेन्ना कॅप्टन एलिसा हिली आवट जालें. फिब लिचफील्ड आनी एलिसा पेरीन दुसरे विकेटी खातीर 61 धांवड्यांची भागिदारी केली. लिचफील्ड 34 धांवड्यो करून आवट जालें. पेरीन 41 धांवड्यो करून बेथ मूनी वांगडा 37 धांवड्यांची भागिदारी केली. हे उपरांत बेथ मूनीन ताहलिया मॅग्रा (24) वांगडा 38 आनी एश्ले गार्डनरा (21) वांगडा 41 भागिदारी केली. जेस जोनासेनान 30 आनी मूनीन 99 बॉलांत नाबाद 81 धांवड्यो केल्ल्यान ऑस्ट्रेलियेन 50 ओव्हरींत 263 धांवड्यो केल्यो. लॉरेन बेल आनी नॅटली सीवरान दरेकी दोन विकेटी घेतल्यो.
8 धांवड्याचेर पयली विकेट पडल्या उपरांत एलीस कॅप्सी (40) आनी टॅमी ब्यूमॉन्टान (47) दुसरे विकेटी खातीर 74 धांवड्यांची भागिदारी करून पंगडाचो शेंकडो पुराय केलो. 15.4 ओव्हरींत इंग्लंडान 121 धांवड्यो केल्यो. नॅटली सीवर ब्रंट (31) आनी कॅप्टन हिथर नायटा 42 धांवड्यांची भागिदारी केली. 194 धांवड्यांचेर डेनिल व्याट (14) आवट जालें. ह्या वेळार तांकां जैता खातीर 96 बॉलांत 70 धांवड्यो जाय आशिल्ल्यो. हिथरान एक सायड सांबाळली ताणे अर्द शेंकडो केलो मात दुसरे वटेन एमी जोन्स (2), सोफी एक्लेस्टन (5) आनी सारा ग्लेन (3) आवट जालीं. 4 आवट 194 वयल्यान तांची स्थिती 8 बाद 235 जाली. निमाणे हिथरान कॅट क्रॉस वांगडा 86 बॉलांत 75 धांवड्यो करून पंगडाक जैत मेळोवन दिलें. क्रॉसान 20 बॉलांत 4 चौक्यांनी 19 धांवड्यो केल्यो. स्पीनर एश्ले गार्डनरात 3 विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
