भांगरभूंय | प्रतिनिधी
नवी दिल्ली, खबरां संस्था: पंजाब, हरियाणा, हिमाचल प्रदेश, बिहार, मध्य प्रदेश आनी छत्तीसगढचीं १० न्यायालयां बॉम्बस्फोटान उडोवपाची धमकी मेळ्ळी. पुलीस पंगड आनी श्वानाचो पंगड वापरून हाचो तपास करतात. सगळेकडेन भंयाचें वातावरण आसा. सगल्या सुवातेर ई-मेल वरवीं धमक्यो आयल्यात.
पंजाबांतल्या फिरोजपूर, मोगा, रोपार जिल्हो न्यायालयांकूय धमक्यो आयल्यात. तशेंच हिमाचल उच्च न्यायालयाकूय धमक्यो आयल्यात.
पंजाब पुलीस सुत्रांनी दिल्ले म्हायती प्रमाण ही धमकी जिल्लो आनी सत्र न्यायाधीशांच्या ई-मेलांचेर आयल्यात. उपरांत रोखडेंच न्यायालय वाठार रितो करपाचें काम सुरू जालें. पूण हो ई-मेल खंयच्यान आयला, कोणें धाडलो आनी तातूंत कितें बरयलां हाचे विशीं खंयचोच अधिकारी कांयच सांगपाक तयार नात.
तरी जतनाय म्हणून पार्किंगाची सुवात रिती करपाचें काम सुरू आसा. थंय सगल्याक पुलीस दळ तैनात केल्यात. कितलेशेच पुलीस पंगड न्यायालयाच्या वाठाराची तपासणी करतात. ह्यान पयलीं अमृतसर, जालंधर, पटियालाच्या शाळांकूय बॉम्बान उडोवपाच्यो धमक्यो आयल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
