भांगरभूंय | प्रतिनिधी
मुख्यमंत्री : ‘म्हजें घर’ येवजण मूळ गोंयकारां खातीरूच आंखल्या
भांगरभूंय । प्रतिनिधी
फोंडें : नेम मोडून तशेंच सरकारी, कोमुनिदाद जमनीर उबीं जाल्लीं घरां कोणाचे राजवटींत उबीं जालीं हें मात्शें जाणा जावन घेयात. तीं घरां उबीं जातना ह्या तथाकथीत विरोधकांनी विरोध कित्याक करूंक ना? खरें म्हणल्यार विरोधकांक मतांचें राजकारण करचे खातीर तीं घरां तशींच राविल्लीं जाय. त्या घरांत रावपी कुटुंबाचे तकलेर सेगीत हुमकळपी तरसाद दवरून कसलें राजकारण करतात? त्या लोकांच्या कश्टांची आमकां जाणीव आसा. हेच खातीर आमी ‘म्हजें घर’ येवजण चालीक लायल्या. हे येवजणे खाला स म्हयन्यां भितर गोंयांतलीं 100 टक्के घरां कायदेशीर जातलीं, अशें मुख्यमंत्री डॉ. प्रमोद सावंत हांणी सांगलें.
प्रियोळ मतदारसंघांतल्या लोकांक हे येवजणे खाला अर्ज दिवपाचे कार्यावळी वेळार मुख्यमंत्री उलयताले. ह्या वेळार तांचे वांगडा आमदार गोविंद गावडे, सरपंच दीक्षा सतरकार, जिल्हो पंचायत वांगडी दामोदर नायक, श्रमेश भोसले, तिवरे वरगांवचे सरपंच जयेश नायक, अतिरिक्त जिल्होधिकारी विशाल कुंडयकार माचयेर उपस्थीत आशिल्ले.
मुख्यमंत्र्यान सांगलें, बेकायदो घरांच्या कारणांक लागून सदांच वादविवाद आनी किजिलां जातालीं. हाका लागून प्रकरणां न्यायालयांत वतालीं आनी न्यायालया कडल्यान घर मोडपा खातीर आदेश जारी जाताले. कश्टान बांदिल्लें घर मोडटना पुराय कुटुंब त्याच वेळार मोडून पडटालें. घर मोडटना सरकाराक लेगीत दुशण दिताले. हेच खातीर लोकांच्या ह्या व्यथांक न्याय दिवचे खातीर आमी ही येवजण चालीक लायल्या. फाटल्या स म्हयन्यांत कायद्या खात्या वांगडा पुराय प्रशासनान ही येवजण सुटसुटीत जावची हे खातीर खर मेहनत घेतल्या.
हे येवजणे संबंदांत विधानसभेंत चर्चा सुरू जाली त्या वेळार लेगीत विरोधकांनी दिशाभूल करपाचो यत्न केलो. आयज लेगीत ते लोकांची दिशाभूल करतात. मात ही येवजण मूळ गोंयकारां खातिरूच आसा, हें सगल्यांनी समजून घेवचें. जांकां घरांची दुरुस्ती करपाची आसा, तांकां भाटकाराच्या नाहरकत दाखल्या बगर, तीन दिसां भितर प्रमाणपत्र मेळटलें. रासवळ कुटुंब पद्दतीक लागून ल्हानसान कारणा वयल्यान वाद निर्माण जाताले. ताचेर उपाय काडला. कायदेशीर विभागणी करून दोनूय भावांक न्याय दिवपाची तजवीज केल्या. अटल आसरा येवजणे खाला लेगीत सगल्या भावांक न्याय मेळटलो, अशें मुख्यमंत्र्यान सांगलें.
खूब कश्टान एके पिळगेक हीं घरां बांदल्यांत. आयज दुसरे पिळगेक आमी मेकळो स्वास दितात. येता त्यो फुडल्यो पिळग्यो ह्या घरांत सुसेगातीन रावतल्यो, अशी तजवीज हे येवजणे खाला केल्या, अशेंय मुख्यमंत्री डॉ. प्रमोद सावंत हांणी सांगलें.
आमदार गोंविंद गावडे हांणी सांगलें, लोकांच्या सहभागाक लागून आनी आदाराक लागून सरकारी येवजण्यो चालीक लावप सोंपें जाता. जे तरेन एक बापूय आपल्या भुरग्याची जतनाय घेता, तेच तरेन आमचें सरकार आमच्या लोकांची जतनाय घेता. ‘म्हजें घर’ सारके येवजणेची प्रियोळांत खर गरज आशिल्ली. घराक राखण मेळप गरजेचें आशिल्लें. मुख्यमंत्र्यान ही येवजण अंमलांत हाडून गोरगरीब लोकांक न्याय दिला. सुशांत नायक हांणी कार्यावळीचें सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
