भांगरभूंय | प्रतिनिधी
पोरूंचे तुळेंत 559 कोटींनी वाडली येणावळ
भांगरभूंय । प्रतिनिधी
पणजीः पोरूंचे तुळेंत अंदूं गोंयची जीएसटी येणावळ वाडल्या. एप्रील ते सप्टेंबर ह्या 6 म्हयन्यांत राज्याची जीएसटी येणावळ वट्ट 3,157 कोटींची आसा. पोरूं एप्रील ते सप्टेंबर मेरेनची जीएसटी येणावळ 2,597 कोटी आशिल्ली. अंदूं राज्याची जीएसटी येणावळ पोरूंचे तुळेंत 559 कोटी चड आसा.
अंदूं गोंयचीच न्हय जाल्यार पुराय देशाचीच जीएसटी येणावळ पोरूं परस चड आसा. सप्टेंबराचो विचार केलो जाल्यार गोंयची अंदूंची जीएसटी येणावळ 497 कोटींची आसा. पोरूं सप्टेंबराची जीएसटी येणावळ 429 कोटी आशिल्ली. ही वाड 16 टक्के आसा. सप्टेंबरांत पुराय देशाची जीएसटी येणावळ 1,62,712 कोटी आसा. हातूंत सीजीएसटी 29818 कोटी आसा जाल्यार एसजीएसटी 37657 कोटी आसा. तशेंच सेस रक्कम 881 कोटींची आसा.
पुराय देशांत सप्टेंबराची जीएसटी येणावळ पोरूंच्या सप्टेंबराचे तुळेंत 10 टक्के चड आसा. अंदूं 2023- 2024 अर्थीक वर्सा एप्रील ते सप्टेंबर मेरेन पुराय देशाची जीएसटी येणावळ 9,92,508 कोटी जाल्या. पोरूं एप्रील ते सप्टेंबर मेरेनची येणावळ 8,93,334 कोटी आशिल्ली. अंदूं देशाची 6 म्हयन्यांतली जीएसटी येणावळ पोरूं परस 11 टक्के चड आसा.
एप्रीलांत सगळ्यांत चड जीएसटी येणावळ
गोंयचो विचार केलो जाल्यार एप्रीलांत 620 कोटींची जीएसटी येणावळ जमा जाली. 6 म्हयन्यांतली सगळ्यांत चड येणावळ एप्रीलांत जमा जाल्या. पोरूंचे तुळेंत अंदूं दरेका म्हयन्यांत जीएसटीची येणावळ वाडल्या. एप्रीलांत 620 कोटी, मे म्हयन्यात 523 कोटी, जूनांत 480 कोटी, जुलयांत 528 कोटी, ऑगस्टांत 509 कोटी जाल्यार सप्टेंबरांत 497 कोटी जीएसटी येणावळ जमा जाल्या. पोरूं लेगीत एप्रीलांत सगळ्यांत चड 470 कोटींची येणावळ जमा जाल्ली.
पोरूंचे तुळेंत अंदूं एप्रीलांतले जीएसटी येणावळ वाडीचें प्रमाण 32 टक्के आशिल्लें. मे म्हयन्यांतली वाड 13 टक्के, जूनांतली वाड 12 टक्के, जुलयांतली 22 टक्के, ऑगस्टांतली 36 टक्के जाल्यार सप्टेंबरांतली वाड 16 टक्के आसा.
अंदूं 6 म्हयन्यांत राज्याक 3157 कोटींची येणावळ जमा जाल्या. सरासरीचो विचार केलो जाल्यार म्हयन्याक 526.16 कोटींची जीएसटी येणवळ जमा जाता.
2023 तली जीएसटी येणावळ (कोटींत)
एप्रील – 620
मे – 523
जून – 480
जुलय – 528
ऑगस्ट – 509
सप्टेंबर – 497
वट्ट – 3157
2022 तली जीएसटी येणावळ (कोटींत)
एप्रील – 470
मे – 461
जून – 428
जुलय – 433
ऑगस्ट – 376
सप्टेंबर – 429
वट्ट – 2597
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
