भांगरभूंय | प्रतिनिधी
खबरां संस्था
नवी दिल्ली : जम्मू-काश्मीरांत आतां मेरेन 6 आतंकवाद्यांचीं घरां मातये भरवण केल्यांत. लश्करान त्राल, अनंतनाग, पुलवामा, कुलगाम आनी शोपियां वाठारांत सर्च ऑपरेशना वेळार ही कारवाय केली.
लश्कराचे कारवायेचें आनी सुरक्षा दलाच्या हालचालींचें थेट प्रक्षेपण करचें न्हय, अशें निर्देश सरकारान शेनवारा प्रसार माध्यमांक दिल्यात. अशें तरेचें प्रक्षेपण नकळटा दुस्मानांक मजत करपाक शकता. जर खंयच्याय चॅनलान टीव्ही नेटवर्क सुदारणा कायदो 2021 चो नेम मोडलो जाल्यार ताचेर कारवाय करतले, अशें म्हायती आनी प्रसारण मंत्रालयान म्हणलां. जम्मू आनी काश्मीरांतल्या पहलगाम वाठारांत जाल्ल्या आतंकवादी हल्ल्यांत 26 जाणांक मरण आयिल्लें. संरक्षण गजालींच्या अहवालांचे फाटभुंयेर हो सल्लो दिला.
द कश्मीर रेजिस्टेंस फ्रंटान पहलगाम हल्ल्याच्या तीन दिसा उपरांत हल्ल्याची जापसालदारकी घेवपाक न्हयकार दिला. हल्ल्या परांत सगल्यांत पयलीं टीआरएफान ताची जापसालदारकी घेतिल्ली.
गुजरातांत शेनवारा सकाळीं एक हजारा परस अदीक घुसखोरांक अटक केली. पुलिसांनी सुरत आनी अहमदाबादांत घुसखोरांचेर कारवाय केली.
घुसखोरांक सोदून काडून तांकां तत्काळ तांच्या देशांत धाडात, अशें शुक्रारा गृह मंत्री अमीत शाह हांणी सगल्या मुख्यमंत्र्यांक सांगिल्लें.
मजगतीं, पाकिस्तानाचे प्रधानमंत्री शहबाज शरीफ हांणी म्हणलां, ते पहलगाम हल्ल्याचे दरेका निश्पक्ष तपासांत वांटो घेवपाक तयार आसात. पाकिस्तानाचेर गरजे भायर दर खेपे आरोप जातात आनी हें सोंसपा भायर आसा.
पाकिस्तानी प्रधानमंत्री एके वटेन तपासाची गजाल सांगता जाल्यार दुसरे वटेन पाकिस्तानाचें सैन्य सेगीत दुसरे खेपे नियंत्रण रेशेचेर फारपेट करतात. भारतीय जवानांनी तांकां जाप दिल्या. लुकसाणेची कसली खबर ना.
पाकिस्तानाचे आदले विदेश मंत्री बिलावल भुट्टो हांणी शुक्रारा जाहीर सभेंत भारता आड खुबळावन घालपी भाशण करतना म्हणिल्लें, एक तर आमचें उदक सिंधू न्हंयेंत व्हांवतलें वा तांचें रगत व्हांवतलें. सिंधू उदक कबलात मोडप शक्य ना. आमी हजारांनी वर्सां सावन हे न्हंयेचे दायजी आसात.
प्रधानमंत्री शाहबाज शरीफ हांकां भरवसो दिता, वेगवेगळ्या राजकी पक्षांक लागून तांचे विचार वेगळे आसत, पूण सिंधी न्हंयेचे कबलातीच्या मुद्द्याचेर ते तांचे वांगडा आसात, अशें भुट्टो हांणी सांगलें. पाकिस्तानाचे संरक्षण मंत्री ख्वाजा आसीफ हांणी शुक्रारा ब्रिटीश दिसाळें द स्कायक दिल्ले मुलाखतींत कबूल केलां, तांचो देश फाटल्या 30 वर्सां सावन आतंकवादाक तेंको आनी प्रशिक्षण दितात. अमेरिका आनी अस्तंत देशां खातीर हें ‘बुरशें काम’ करतात. ही आमची चूक आनी ताची ख्यास्त आमी भोगतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
