भांगरभूंय | प्रतिनिधी
भांगरभूंय । समीप नार्वेंकार
पणजीः गोंयांत आतां मेरेन 56 जाणांनी आपल्यो किडणीं दान करून दुसऱ्यांक एक नवो जल्म दिला. हातूंत जिवीत आशिल्ल्या लोकांचें किडणी दिवपाचें प्रमाण चड आसा. किडणीं दान करपी बायलांची संख्या चड आसा जाल्यार दादल्यां मदीं किडणी खातीर मागणी चड आसा. ऑगस्ट 2024 मेरेन 68 पेशंट ट्रान्सप्लांटा खातीर किडणीची वाट पळयतात, अशी म्हायती राज्य अवयव आनी पेशी ट्रान्सप्लांट संघटणेन (सोट्टो) दिल्या.
आयज संवसारीक अवयव दान दीस मनयतात. हे फाटभुंयेर गोंयांत 2011 ते आतां मेरेन कितले अवयव आनी पेशींचें दान जालां, हाची म्हायती सोट्टो हांणी दिल्या. गोंयांत किडणी दान करपाचें प्रमाण सगळ्यांत चड आसा. उपरांत कोर्निया (दोळें), फिग्द, काळीज आनी पुल्मांव हांचो नंबर लागता. जे कोण इत्सूक आसात तांचे खातीर किडणी दान करपाची प्रक्रिया 2011 त चालीक लागली. जाल्यार जे भायर पडिल्ले लोक आसात तांचे खातीर किडणी दान प्रक्रिया 2020 च्यान अंमलात आयली. जिवीत आसपी 46 लोकांनी आपल्यो किडणीं दान करून त्याच वेळार दुसऱ्या दुयेंतींक त्यो ट्रान्सप्लांट केल्यात. खाजगी हॉस्पिटलांनी हाचें प्रमाण चड आसा.
जिवीत आसतनाचे किडणी ट्रान्सप्लांट ऑपरेशन खाजगी हॉस्पिटलांनी 52 टक्के जालां. हॅल्थवे हॉस्पिटलांत 20 जाणांचें जाल्यार मणिपाल हॉस्पिटलांत 4 जाणांचें किडणी ट्रान्सप्लांट जालां. जाल्यार सरकारी हॉस्पिटलांनी हाचें प्रमाण 48 टक्के आसा. फक्त गोंय वैजकी महाविद्यालयाच्या हॉस्पिटलांत (गोमॅकॉ) 22 जाणांचें किडणी ट्रान्सप्लांट जालां.
जिवीत आसतना किडणी दान करपा बाबतींत बायलांचें प्रमाण 67 टक्के आसा जाल्यार दादल्यांचें 33 टक्के आसा. जाल्यार ह्यो किडणी ट्रान्सप्लांट करून घेवपी दादल्यांचें प्रमाण 70 टक्के आसा जाल्यार बायलांचें प्रमाण 30 टक्के आसा. 31 बायलांनी आपल्यो किडणीं दान केल्यात जाल्यार 32 दादल्यांक किडणीं मेळ्ळ्यात. 15 दादल्यांनी किडणीं दान केल्यात जाल्यार 14 बायलांक किडणीं मेळ्ळ्यात. सगळ्यांत तरणाटो किडणी दान करपी मनीस 33 वर्सां पिरायेचो आसा जाल्यार सगळ्यांत उणें पिरायेचो किडणी ट्रान्सप्लांट करपी मनीस 15 वर्सांचो आसा. सगळ्यांत चड पिराय आशिल्लो किडणी दान करपी मनीस 69 वर्सांचो आसा जाल्यार 66 वर्सां सगळ्यात चड पिराय आशिल्या मनश्यान किडणी ट्रान्सप्लांट करून घेतल्या.
घरकान्न, आवयन दिलें नवें जिवीत
किडणीच्या रुपांत जिवीत बायलांनी आपल्या घरकारांक जिवनदान दिवपाचें प्रमाण 37 टक्के आसा जाल्यार घोवान आपले घरकान्नीक किडणी दिवपाचें प्रमाण 15 टक्केच आसा. 17 बायलांनी आपल्या घोवांक किडणीं दिल्या जाल्यार फक्त 7 घोवांनी आपल्या घरकान्नींक किडणीं दिल्यात. जाल्यार 11 आवयांनी आपल्या पुतांक आनी 2 आवयांनी आपल्या धुवांक किडणीं दिल्यात. तशेंच 3 चल्यांक आनी 4 चलयांक आपल्या बापाय कडल्यान किडणीं मेळ्ळ्या. जाल्यार दरेका एका भावा भयणांनी आपल्यो किडणीं एकामेकांक दान केल्यात.
मरणा उपरांत 10 जाणांनी केल्यो किडणी दान
10 जाणांनी मरण आयले उपरांत आपल्यो किडणीं दान केल्यात. 80 टक्के मरण पाविल्ले दादले जाल्यार 20 टक्के मरण पाविल्ल्या बायलांनी आपल्यो किडणीं दान केल्यात. 4 दादल्यांनी आनी एके बायलेन आपल्यो किडणीं दान केल्यात. जाल्यार 8 दादल्यांनी आनी 2 बायलांनी किडणीं ट्रान्सप्लांट केल्यात. सगळ्यांत तरणाटो 21 वर्सां जाल्यार सगळ्यांत जाण्टो 61 वर्सां पिरायेच्या मनशान किडणी दान केल्या. जाल्यार सगळ्यांत तरणाटो 27 वर्सां आनी जाण्टो 50 वर्सां पिरायेच्या मनशान किडणी ट्रान्सप्लांट केल्या.
68 दुयेंतींक किडणीची अजून प्रतिक्षा
गोंयांत अजून मेरेन 68 दुयेंती अशे आसात जे किडणी खातीर आस्त लावन बसल्यात. हातूंत दादल्यांचें प्रमाण सगळ्यांत चड 60 टक्के आसा. 41 दादले आनी 27 बायलांक किडणीची गरज आसा. 25 वर्सां ते 69 वर्सां पिराये मेरेनचे दुयेंती किडणी खातीर वाट पळयतात.
किडणी उपरांत दोळे दान दिवपाचें प्रमाण चड
किडणी फाटल्यान मरण आयले उपरांत 29 जाणांनी आपले दोळे दान केल्यात. 19 ते 87 वर्सां पिराये मेरेनच्या 17 बायलांनी आनी 12 दादल्यांनी हे दोळे दान केल्यात. एसजी हॉस्पिटलांत 83 टक्के आनी हेल्थवे हॉस्पिटलांत 17 टक्के फक्त खाजगी हॉस्पिटलांनी दोळ्यांचें ट्रान्सप्लांट जाता. मजगतीं, 4 जाणांनी आपले फिग्द, 3 जाणांनी आपले काळीज आनी एकल्यान आपलीं दोनूय पुल्मांवां दान केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
