भांगरभूंय | प्रतिनिधी
पणजीः 20 ते 28 नोव्हेंबर मेरेन राज्यांत जावपी 55व्या आंतरराष्ट्रीय चित्रपट महोत्सवा खातीर प्रतिनिधी नोंदणी प्रक्रिया सुरू जाल्या. दर वर्सा इफ्फी प्रतिनिधी नोंदणी चड करून 8 ते 13 सप्टेंबर मेरेन सुरू जाता. पूण अंदूं कळाव जाला. सध्या राज्यांत इफ्फीची तयारी चालू आसा. गोंयच्या मनरिजवण सोसायटीन वेगवेगळ्या कामां खातीर निविदा जारी केल्या. अंदूं इफ्फीक बरो प्रतिसाद मेळटलो अशी आयोजकांची आस्त आसा.
फाटल्या सप्तकांत केंद्रीय म्हायती आनी प्रसारण सचीव संजय जाजू, महोत्सव संचालक शेखर कपूर हांणी मुख्यमंत्री डॉ. प्रमोद सावंत हांची भेट घेतली. हाचे उपरांत ताणें कला अकादमीक भेट दिली. अंदूं चड लोकां मेरेन पावपाचो यत्न करतलों अशें तांणी स्पश्ट केल्लें.
अंदूं ईएसजी वाठारांत, आयनॉक्स, पर्वरी हांगा चित्रपट दाखयतले. कला अकादमींत फिल्म दाखोवपा विशीं अजून निर्णय जावंक ना. पणजे भायर हेर व्हड शारांनी चित्रपट दाखयतले. सुरक्षा रक्षक, कोयर वेवस्थापन, जाग्याची सोबीतकाय, उक्त्या सुवातेची तपासणी, बायो टॉयलेट, प्रोजेक्टर, स्कॅनर, इंटरनॅट आनी हेर सुविधां खातीर ईएसजीन निविदा जारी केल्या.
55व्या एफीच्या पोस्टराचें अनावरण मे म्हयन्यांत फ्रांसांत जाल्ल्या कान आंतरराष्ट्रीय चित्रपट महोत्सवांत जाल्लें. सध्या आयएफएफआयच्या आंतरराष्ट्रीय, भारतीय पॅनोरमा आनी बेस्ट ओटीटी, क्रिएटिव्ह मायंड ह्या वर्गां खातीर अर्ज करपाचो काळ सोंपला. हाचे भायर अंदूं पयलेच खेपे भारतीय चित्रपटांत पदार्पण करपी उत्कृश्ट दिग्दर्शका खातीर अर्ज आयल्यात. ह्या विभागांत देशभरांतले उत्कृश्ट पांच चित्रपट दाखयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
