भांगरभूंय | प्रतिनिधी
माॅस्को, खबरां संस्था ः 1970 च्या दशकांत सोविएत युनियनान रशियन अंतराळयान कॉसमॉस 482 लाँच केल्लें. सुरवेक हें अंतराळयान शुक्र गिऱ्याचेर धाडलें. आतां सुमार 53 वर्सां उपरांत हें अंतराळयान धर्तरेचेर पडटलें असो अदमास आसा. अंतराळयान अजून निमाण्या गंतव्य थळार पावूंक ना.
नासाच्या म्हणण्या प्रमाण, 7 मे ते 13 मे ह्या काळांत कॉसमॉस 482 धर्तरेच्या वातावरणांत परतून प्रवेश करपाची शक्यताय आसा. अंतराळ एजन्सीच्या म्हणण्या प्रमाण, प्रोब जळनासतना परतून प्रवेश करतना तिगून उरुंक शकतली. कारण शुक्राच्या खर वातावरणाक तोंड दिवपा खातीर ताची रचना केल्ली. डच शास्त्रज्ञ मार्को लँगब्रोक हाणें अदमास काडला, हें यान शेनवार, 10 मे दिसा पावूंक शकता. ते तिगून उरलो जाल्यार मुखेल भाग सुमार 150 मैल दर वराक वेगान जमनीचेर पावूंक शकता.
सीएनएनच्या म्हणण्या प्रमाण, एंट्री कॅप्सूल जे शुक्र गिऱ्याच्या वातावरणाच्या अत्यंत उश्णताय आनी दाब सोंसपा खातीर तयार केलां. जे धर्तरेपरस 90 पटींनी चड घनतेचे आसा. हें यान धर्तरेचेर परतून येवपी अंतराळयानाचो एक भाग आसूं येता अशें शास्त्रज्ञांचें मत आसा. हें अंतराळयान उत्तर आनी दक्षिणेक 51.7 अंशां मदीं खंयच्याय सुवातेर देंवूंक शकता. हातूंत दक्षीण अमेरिकेच्या दक्षीण तोंकाक आशिल्लें केप हॉर्न, कॅनडांतलें लंडन आनी एडमंटन सारक्या उत्तरे कडल्या सुवातींचो आस्पाव आसा. डच शास्त्रज्ञ लँगब्रोक हाणें असोसिएटेड प्रेसाक सांगलें, हें यान दर्यांत देंवतलें आसूं येता. कारण धर्तरेचो चडसो पृश्ठभाग उदकान व्यापिल्लो आसा.
कॉसमॉस 482 ची सद्याची स्थिती कितें?
कॉसमॉस 482 यानाचे चार कुडके जाल्यात. पूण लँडींग मॉड्यूल अजूनय म्हत्वाचें आसा. कॉसमॉस 482 चे मुखेल लँडींग मॉड्यूलाचें वजन सुमार 480 ते 500 किलोग्राम आसा. ह्या गोलाकार अंतराळयानाचो व्यास सुमार एक मीटर आसा. आतां ते 400 किमी सकयल देंवला आनी ल्हवू ल्हवू धर्तरे लागीं पावता. त्या वेळार ह्या मॉड्यूलाचें बांदकामूय घटमूट आनी टिकाऊ आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
