भांगरभूंय | प्रतिनिधी
नवी दिल्ली, खबरां संस्था ः दरेका गरीब मनशाक सरकारी येवजणेचो फायदो मेळोवपाक भारत सरकाराच्या जनधन येवजणेचो खूब म्हत्वाचो वांटो आसा. प्रधानमंत्री जन धन येवजणे खाला उगडपी सुमार 20 टक्के बँक खातीं निश्क्रीय आसात. 6 डिसेंबर मेरेन वट्ट 10.34 कोटी निश्क्रीय खात्यांतल्यान 4.93 कोटी खातीं बायलां कडल्यान उक्तीं केल्लीं अशी म्हायती अर्थ राज्यमंत्री भागवत कराड हांणी राज्यसभेक दिली.
देशभरांतल्या बँकां कडल्यान मेळिल्ल्या आंकड्यां प्रमाण सुमार 51.11 कोटी प्रधानमंत्री जन धन खात्यांतलीं सुमार 20 टक्के खातीं 6 डिसेंबर मेरेन निश्क्रीय आसात. निश्क्रीय जनधन खात्यांत जमा जाल्ली शिल्लक सुमार 12779 कोटी रुपया आसा. जी पीएमजेडीवाय खात्यांतल्या वट्ट जमा निधीच्या सुमार 6.12 टक्के आसा. ही शिल्लक सक्रिय खात्यांक लागू आशिल्ल्या व्याजाच्या दरान व्याज मेळत रावता आनी खात्यांचो वेपार परतून सुरू जाले उपरांत खंयच्याय वेळार ठेवीदारांक दावो करपाक मेळटा आनी पयशेय काडूंक मेळटा. वेगवेगळ्या उपक्रमांक लागून निष्क्रिय खात्यांची टक्केवारी मार्च 2017 वर्सा 40 टक्क्यांवयल्यान नोव्हेंबर 2023 वर्सा 20 टक्क्यांनी देंवल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
