500 वर्साच्या प्रतिक्षे उपरांत रामलल्लाच्या मुर्तीची प्राणप्रतिश्ठा
भांगरभूंय | प्रतिनिधी
अयोध्या, खबरां संस्था ः आयच्या खिणांची सगळींच वाट पळयतालीं. 500 वर्साचे प्रतिक्षे उपरांत निमणे आयज अयोध्यांतल्या राममंदिरांत श्री रामाच्या मुर्तीची प्राणप्रतिश्ठापना जाली. प्रधानमंत्री नरेंद्र मोदी हांचे हस्तुकीं श्री राम मुर्तीची पूजा आनी धर्मीक विधी जाले. ह्या वेळार गर्भकुडींत तांचे वांगडा उत्तर प्रदेशाचे मुख्यमंत्री योगी आदित्यनाथ, राष्ट्रीय स्वयंसेवक संघाचे सरसंघचालक मोहन भागवत हाजीर आशिल्ले.
श्री रामलल्लाक आयज ताच्या मूळ जल्मस्थान आशिल्ल्या अयोध्येच्या भव्य देवळांत स्थापन केलो. प्रधानमंत्री नरेंद्र मोदी हांच्या यजमानके खाला दनपारां 12:20 वरांचेर वैदिक जपांत श्री राम मूर्तिची प्राणप्रतिश्ठापना जाली. भारतांतच न्हय तर अमेरिकेंत, ब्रिटन सयत 50 परस चड देशांनी हो सुवाळो लायव्ह दाखयलो.
ह्या भव्य सुवाळ्याक आयज अयोध्या शारांत 7 हजारां परस चड मानेस्त आनी हजारांनी रामभक्त हाजीर आशिल्ले. तातूंत नामनेचे उद्देजक रतन टाटा, उद्देजक मुकेश अंबानी, तांचे कुटुंब आनी अदानी गटाचे अध्यक्ष गौतम अदानी, बिर्ला गटाचे कुमार मंगलम बिर्ला आनी रेमंड गटाचे मुखेली अनिल सिंघानिया, अभिनेते रणबीर कपूर, आलिया भट, जॅकी श्राॅफ, विवेक आॅबेराॅय, अमिताभ बच्चन, अभिषेक बच्चन, विकी कौशल्य, कतरिना कैफ, रजनीकांत, आयुश्यमान खुराणा, रोहीत शेट्टी, अनुपम खेर, राजकुमार हिरानी, माधुरी दिक्षीत, सचिन तेंडुलकर हांचे सयत भारतीय उद्देग, मनरिजवण, खेळ, संगीत आनी हेर मळां वयल्या सेलिब्रिटींचो आस्पाव आशिल्लो. कंगना राणावत हिणें देवाचें दर्शन घेवन वाठार नितळ करपांत वांटो घेतलो.
गोंयचे कुंडय मठाधीश ब्रह्मेशानंद स्वामी, उद्देगपती श्रीनिवास धेंपे आनी हेर बरेच गोंयकार अयोध्येक गेल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
