भांगरभूंय | प्रतिनिधी
रानमेव्याक भांगराचें मोल ; काण्णां 100 रुपयांक वाटी
भांगरभूंय । प्रतिनिधी
पणजी : पणजी बाजारांत रानमेवो आयला. ताका भांगराचें मोल आयलां. जांबळां 500 रुपयांक 100 नग जाल्यार चुन्नां 50 रुपया वाटी आनी काण्णां 100 रुपया वाटी ह्या दरान विकताले. मजगतीं, हेर भाजयो आनी फळांचे दर स्थीर आशिल्ले.
सोमारा रानमेव्या वांगडाच फोकां 400 रुपया वांटो जाल्यार काप्या पणसाचे गरे 100 रुपया वांटो मेळटालो. मानकुराद आंब्याचे दर स्थीर आशिल्ले. मानकुराद आंबो आकार आनी दर्जा प्रमाण 1500 रुपया, 1400 रुपया आनी 1200 रुपया डझन ह्या दरान विकताले.
फाटल्या सप्तकाचे तुळेंत सोमारा बाजारांत हेर भाजयांचे दर स्थीर आशिल्ले. ल्हान लसूण 150 रुपया, जाल्यार व्हड लसूण 400 रुपया कील आशिल्ली. आल्याचे दर 180 ते 200 रुपया कील आशिल्ले. कांदे, बटाट आनी टमाटां दरेकी 40 रुपया कील जाल्यांत. भेंडें, वांयगीं, कारातीं 80 रुपया कील आशिल्ली. मिरसांगेचो दर 20 रुपयांनी उणो जावन 100 रुपया कील जाला. फ्लावर 50 रुपया नग ह्या दरान विकताले. जाल्यार कोबी 40 रुपया कील आशिल्लो. वालपापडी दर्जा प्रमाण 80 ते 120 रुपया कील आशिल्ली. तवशीं 60 रुपया कील विकताले. मेथयेची एक जुडी 25 रुपया, पालक, कांद्याची पात दरेकी 15 रुपया जुडी आशिल्ली. शेपू 25 रुपया, जाल्यार कोथमीर 30 रुपयाक एक जुडी आशिल्ली. नाल्ल आकारा प्रमाण 30 ते 50 रुपया नग आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
