भांगरभूंय | प्रतिनिधी
मुखमंत्रीः 17 हजार ‘लखपती दीदी’ तयार करपाचें ध्येय
भांगरभूंय | प्रतिनिधी
पणजी : गोंयची फाटलीं 50 वर्सां जावंक ना, तितली उदरगत केंद्र आनी राज्यांतल्या भाजपाच्या डबल इंजीन सरकारान फकत 10० वर्सांनी करून दाखयल्या. गोंयचे उदरगतींत प्रधानमंत्री नरेंद्र मोदी हांचें खूब म्हत्वाचें योगदान आसा, अशें मुख्यमंत्री डॉ. प्रमोद सावंत हांणी सांगलें. गोंय विद्यापीठाच्या मैदानाचेर बिरेस्तारा जाल्ल्या 63 व्या गोंय मुक्ती दिसाच्या सुवाळ्यांत ते उलयताले. राज्यांतलो समाजीक एकवट अखंडीत दवरपाची जापसालदारकी गोंयकारांची आसा. दरेकल्यान ती योग्य तरेन सांबाळची अशेंय तांणी म्हणलें.
केंद्र आनी राज्य सरकारान फाटल्या धा वर्सांत गोंयची पूर्ण उदरगत करपा खातीर जायतीं सकारात्मक पावलां उबारल्यांत. ताचें फळ गोंय आनी गोंयचे जनतेक आयज मेळटा. राज्य सरकारान चालीक लायिल्ल्या ‘स्वयंपूर्ण गोंय’चो लाव जायत्या जाणांक मेळपाक लागला. स्वता प्रधानमंत्री नरेंद्र मोदीं सयत जायत्या राज्यांनी ह्या उपक्रमाची दखल घेतल्या. केंद्र सरकाराच्या आदारान वेगवेगळ्या मळांचेर मुळाव्यो सुविधा उबारपाक राज्य सरकाराक अपेक्षीत येस मेळत आसा, अशें मुख्यमंत्र्यान मुखार सांगलें.
‘हर घर नल’ येवजणे खाला गोंयांतल्या 40 टक्के लोकांक फुकट उदक मेळटा. नुस्तेमारी येवजणेचो लाव 500 परस चड नुस्तेमारांक मेळ्ळा. गोंयांत 1130 कोटी रुपयांचें जमनी पोंदच्यान लायटीच्यो सरयो घालपाचें काम चालू आसा. जोडणी सुदारपा खातीर 4 जी बीएसएनएल टॉवरांचें जाळें विणपाचें काम चलता. अंदूं 1059 कोटींच्या 15 प्रकल्पांक ‘आयपीबी’ कडल्यान मान्यताय मेळ्ळ्या, आनी तातूंतल्यान 1894 लोकांक रोजगार मेळटलो असो विस्वास मुख्यमंत्र्यान उक्तायलो. म्हादयचो प्रवाह तिगोवन दवरपा खातीर राज्य सरकार बांदील आसा. सर्वोच्च न्यायालयांत सरकार योग्य रितीन झगडटा अशेंय तांणी सांगलें.
बायलां सबलीकरणा खातीर सरकारान फाटल्या कांय वर्सां सावन विवीध येवजण्यो सुरू केल्यात. ताचो लाव गोंयच्यो लाखांनी बायलो घेतात. फुडलें वर्सभर गोंयांत 17 हजार ‘लखपती दीदी’ तयार करपाचें सरकाराचें ध्येय आशिल्ल्याचेंय मुख्यमंत्री डॉ. सावंत हांणी सांगलें. मजगतीं, केंद्रीय मंत्री श्रीपाद नायक आनी राज्यसभा खासदार सदानंद शेट तानावडे हांचे हाजेरींत दिल्लींत गोंय मुक्ती दीस सुवाळो मनयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
