50 लाखांच्या भांगरा सयत चार खांप्या गुन्यांवकारांक अटक
भांगरभूंय | प्रतिनिधी
मडगांव : मडगांव कोंकण रेल्वे पुलिसांनी सुरत कलच्यान मत्स्यगंधा गाडयेंतल्यान आयिल्ल्या चार खांप्या गुन्यांवकारांक अटक केली. दुबावितां कडल्यान चोरयेचें सुमार ५० लाखांचें भांगर आनी ३७ हजारांची रोख जप्त केली. दुबावीत हरियाणांतल्या सहाशी गांवांतले आशिल्ल्याची म्हायती रेल्वे सुरक्षा पुलिसांनी दिली.
मडगांव रेल्वे सुरक्षा दळा कडल्यान हरियाणाच्या सहाशी गँगच्या चार खांप्या गुन्यांवकारांक अटक केली. दक्षीण, पश्चीम रेल्वे सुरक्षा दळाकडल्यान मेळिल्ले म्हायती प्रमाण मडगांव रेल्वे सुरक्षा दळा वतीन ही कारवाय केली. चार खांपे गुन्यांवकार प्रवाशांचें सामान चोरी करून सुरतकल कर्नाटकच्यान मडगांव रेल्वे स्टेशनाचेर देंवतले अशी म्हायती मेळ्ळी. ते प्रमाण रेल्वे सुरक्षा दळाच्या अधिकार्यांनी, रेल्वे सुरक्षा दळाच्या जवानांची पंगड तयार केले. दुबावितां मदले तीग जाण रेल्वे गार्डच्या फाटल्या डब्या लागसारच्या डब्यातल्यान प्रवास करताले. जाल्यार एक दुबावीत रेल्वेच्या फुडल्या जनरल डब्यांतल्यान प्रवास करतालो. रेल्वे मडगांव स्टेशनाचेर पावतांची फडल्या डब्यांतल्या दुबावितान खांवपी गाडयेंतल्यानूच पळ काडपाचो यत्न केलो. मात रेल्वे सुरक्षा दळाच्या पुलिसांनी ताका ताब्यांत घेतलो.
पुलिसांनी दुबाविता कडल्यान बारा काकणां, चार हार, दोन नेकलेस, एक मंगळसूत्र, चार भांगराच्यो सरपळ्यो, एक मोतयांची माळ, स कानांतलीं, चार मुदयो अश्यो सुमार ५० लाख रुपयांच्यो भांगरा वस्ती आनी रोख ३४५०० रुपया जप्त केले. पुलिसांनी दुबावीत दिलबाग रिसाल सिंग हांचे सयत राजेश लिलू राम (४२), मनोज कुमार जितेंद्र पृथ्वी सिंग हांकां लागून अटक केली. दुबावीत जितेंद्रा कडल्यान दोन पॉकेट कटर जप्त केले. रेल्वे सुरक्षा दळान केल्ले चवकशेंत हे चारूय दुबावीत हरियाणांतले आशिल्ल्यान ते सहाशी गँगचे वांगडी जावन आसात. ही टोळी रेल्वेंतल्यान प्रवाशांचें सामान चोरता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
