भांगरभूंय | प्रतिनिधी
नवी दिल्ली, खबरां संस्था ः भारतांत 5 जी नेटवर्क सुरू जावन एक वर्स जाले. एक वर्सा आदीं 5 जी नेटवर्काची गती खूब वायट आशिल्ली. पूण वर्सभरांत परिस्थितींत बदल जालो. भारतांत 5जी नेटवर्काची गती खूब सुदारल्या. हातूंत भारतान बरी कामगीरी केला. संवसारांतल्या व्हडल्या देशांक फाटीं घालून भारत 5 जी नेटवर्कांतल्या पयल्या 15 देशांच्या वळेरेंत पावला. ह्या 15 देशांनी 5जी नेटवर्क गती सगळ्यांत वेगान चलता. भारतांत जियो आनी एअरटेल कंपनी उच्च गतीचे 5 जी नेटवर्क सेवा दितात. भारतांतल्या मेट्रो शारांनी 5 जी सेवा सुरू जाल्या. पूण सामान्य शारांनी ही सेवा अजून सुरू जावंक ना. ह्या वर्सा भितर देशभरांत 5 जी नेटवर्क सुरू जावपाची शक्यताय आसा.
नेटवर्क टेस्टिंग आनी एनालिस्ट कंपनी ओक्लाच्या अहवाला प्रमाण भारत संवसारीक पांवड्यार 5 जी गतींत डाउनलोडिंग गतीचे नदरेन 14 वे सुवातेर आसा. भारतांत ही गती 301.86 mbps आशिल्ली. आनी हे वेळार मीडियन अपलोडिंग स्पीड 18.93 mbps उरली. जाल्यार युएई (654 mbps) पयल्या क्रमांकाचेर, कतर (516 mbps) दुसरें आनी साउथ कोरिया (485 mbsp) तिसरें सुवातेर आसा.
सगळ्यांत नेटान 5जी सुरू करपाच्या मळार भारत संवसारांत फुडाकार घेता. डिसेंबर 2023 मेरेन भारतांत 400 हजार 5जी बेस स्टेशनां आशिल्ली. जानेवारी 2024 मेरेन तांतूत 7.7 टक्क्यांनी वाड जाल्या. 2023 वर्साच्या चवथ्या तिमाहीत 5 जी मीडियन डाउनलोडिंग स्पीड 301.86 mbps आशिल्ली. 4 जी गती परस ही 18 पटीन वेगवान आशिल्ली. तशेंच 5 जी अपलोडिंग स्पीड 16.05 mbps नोंद जाली. ती 4G परस 5 पटींनी वेगवान आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
