भांगरभूंय | प्रतिनिधी
कर्मचारी भरती : अर्ज भरिल्ल्या 85 टक्के उमेदवारांनी दिली परिक्षा
भांगरभूंय । प्रतिनिधी
पणजी : एलडीसी भरती खातीर कर्मचारी भरती आयोगान घेतिल्ले सीबीटी परिक्षेचो निकाल आयोगान 48 वरां भितर जाहीर केला. परिक्षेक बशिल्ल्या सगळ्या उमेदवारांचो निकाल आयोगाच्या संकेतथळाचेर उपलब्ध आसा. अर्ज भरिल्ले 85 टक्के उमेदवार परिक्षेक बसले, अशी म्हायती सचीव शशांक ठाकूर हांणी दिली.
एलडीसीच्या 232 पदां खातीर 22,045 अर्ज आयिल्ले. तातूंतले 18,718 उमेदवार परिक्षेक बसले. हें प्रमाण 85 टक्के जाता. 3,327 उमेदवार परिक्षेक गैरहाजीर रावले. आतां दोन दिसांत उमेदवाराच्या लॉगीन आयडीचेर ताची प्रस्नपत्रिका घालतले. हाका लागून आपणे दिल्ल्यो जापो बरोबर आसा काय चूक आसा, हें उमेदवारांक पळोवपाची संद मेळटली. खंयच्या प्रस्नाक गूण मेळ्ळे आनी खंयच्या प्रस्नाक गूण मेळूंक ना, हें कळपाक उमेदवाराक मजत जातली. हाचे उपरांत कागाळ करपाची संद उमेदवारांक मेळटली. गुणांविशीं कागाळ आसली जाल्यार अर्ज भरून तो आयोगाक सादर करचो पडटलो. अर्जाचो नमुनो तशेंच सादर करपाचे तारखेची नोटीस संकेतथळा वरवीं जाहीर जातली. हाचे उपरांत तज्ञ समिती कागाळींचेर निर्णय घेतली. कागाळींचेर निर्णय जाल्या उपरांत निमाणो निकाल जाहीर जातलो आनी फुडले परिक्षे खातीर पात्र उमेदवारांची वळेरी जाहीर जातली. शेनवारा 25 जानेवारीक परिक्षा सोपले उपरांत दुसऱ्या दिसा आयतारा सुटी आशिल्ली. हाका लागून सोमारा निकाल जाहीर जावंक ना. दुसऱ्याच दिसा निकाल जाहीर जावपाचो आसलो.
11 जानेवारी, 12 जानेवारी, 18 जानेवारी, 19 जानेवारी आनी 25 जानेवारी हे 5 दीस परिक्षा जाली. शेनवारा 11 तारखेक आग्नेल इनिस्टट्यूट ऑफ टॅक्नोलॉजी (आसगांव), डॉन बॉस्को कॉलेज ऑफ इंजिनियरींग (फातोड्डें), रोझरी कॉलेज ऑफ कॉमर्स अॅण्ड आर्टस (नावेली), नॅशनल इन्स्टिट्यूट ऑफ टॅक्नोलॉजी (कुंकळ्ळी) ह्या 4 केंद्रांचेर परिक्षा जाली. आयतारा 12 तारखेक आग्नेल इनिस्टट्यूट ऑफ टॅक्नोलॉजी (आसगांव), सेंट झेवियर (म्हापशें), डॉन बॉस्को कॉलेज ऑफ इंजिनियरींग (फातोड्डें), रोझरी कॉलेज ऑफ कॉमर्स अॅण्ड आर्टस (नावेली), नॅशनल इन्स्टिट्यूट ऑफ टॅक्नोलॉजी (कुंकळ्ळी) ह्या 5 केंद्रांचेर परिक्षा जाली. सकाळीं 9.15 ते 10.30 मेरेन पयली बॅच, हाचे उपरांत 11.30 ते 12.45 दुसरी बॅच, दनपारां 2 ते 3.15 तिसरी आनी सांजे 4.15 ते 5.30 मेरेन चवथे बॅचीचो पेपर जालो. दरेका दिसा 4 हजार विद्यार्थी परिक्षेक बसले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
