भांगरभूंय | प्रतिनिधी
नवी दिल्ली : इराण पुराय काबार करता म्हूण अमेरिकेचे राष्ट्राध्यक्ष डोनाल्ड ट्रम्प हांणी धमकी दिल्या उपरांत इराणांत बॉम्ब हल्ले जाले. ते फाटभुंयेर भारत सरकारान इराणांत आशिल्ल्या भारतीयां खातीर दिशानिर्देश जारी केल्या. 48 वरां आसा थंयच रावात म्हूण भारतीय दुतावासान इराणांतल्या लोकांक सुचोवणी दिल्या. तशेंच वीज प्रकल्प, लश्करी आस्थापनां, तळ आशिल्ल्या सुवातां लागीं रावं नाकात, अशी सुचोवणीय दिल्या.
लोकांनी भोवमजली इमारतींचे वयले मजले टाळचे. दुतावासान भाड्यान घेतिल्ल्या हॉटेलांत जे रावतात, तांणी थंयच रावचें. दुतावासा कडेन संपर्कांत रावचें, दुतावास कितें दिशानिदेश दिता, ताची अपडेट पळयत रावात, दुतावासाचे आपत्कालीन फोन क्रमांक आसात, कितेंय म्हत्वाचें आसल्यार कळोवचें, अशें दुतावासान म्हणलां.
डोनाल्ड ट्रम्प हांणी इराणाक मंगळारा व्हड शिटकावणी दितना ‘आयज रातीं इराणाची पुराय संस्कृताय मरतली’ अशें म्हणलें. ट्रुथ सोशलाचेर बरयल्ल्या एका पोस्टांत ताणें ‘जरी ताका तें घडपाक जायना अशें दिसता, तरी घडये तें जातलें. 47 वर्सांची खंडणी, भ्रश्टाचार आनी मरण निमाणें सोंपतलें म्हणून आयज रातचो दीस संवसारीक इतिहासांतलो एक म्हत्वाचो खीण आसतलो’, अशें बरयलां.
इराणाक पुरायपणान काबार करता म्हूण ट्रम्प हट्टाक पेटला.
मजगतीं, इराणान अमेरिके कडेन जावपी सगले राजनैतीक आनी अप्रत्यक्ष संवाद बंद केल्यात, अशें तेहरान टायम्सान म्हणलां.
“इराणान अमेरिके कडेन संपर्काचे सगळे राजनैतीक आनी अप्रत्यक्ष मार्ग बंद केल्यात. खंयच्याय आनी सगळ्या संदेशांची देवाण-घेवाण लेगीत स्थगीत केल्या.
मजगतीं, अमेरिकेन खर्ग जुंव्याचेर इराणाच्या तेल केंद्राचेर, लश्करी तळाचेर हल्लो केल्ल्याची म्हायती आसा. ह्या हल्ल्यान ह्या जुंव्याक दुसरे खेपे लक्ष्य केल्लें. मजगतीं, इझ्राएली झुजारी विमानांनी इराणांतल्या पुलांचेर आनी रेल्वेमार्गांचेर हल्लो केलो, अशी खबर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
