भांगरभूंय | प्रतिनिधी
नवी दिल्ली, खबरां संस्था ः देशांतल्या 45% आमदारांचेर गुन्यांवकारी खटले दाखल आसात अशें वेंचणूक सुदारणांचेर काम करपी असोसिएशन ऑफ डेमोक्रेटिक रिफॉर्म्स (ADR) हे स्वयंसेवी संस्थेच्या अहवालांत दिसून आयलां. एडीआरान 28 राज्यां आनी विधानसभां आशिल्ल्या तीन केंद्रशासित प्रदेशांतल्या वट्ट 4,123 आमदारांतल्या 4,092 आमदारांच्या वेंचणुक प्रतिज्ञापत्रांचें विश्लेशण केलें.
आंध्र प्रदेशांत 174 आमदारांतले सगळ्यांत चड 138 आमदार (79%) जाल्यार सिक्किमांत सगळ्यांत उणे 32 आमदार (3%) आसात, जांणी स्वताचेर गुन्यांवकारी खटले जाहीर केल्यात. तेलुगू देशम पक्षाच्या (टीडीपी) 134 आमदारांतले सगळ्यांत चड 115 (86%) आमदार आसात, तांचेर गुन्यांवकारी खटले नोंद जाल्यात.
1,861 आमदारांनी तांचे आड गुन्यांवकारी खटले जाहीर केल्यात अशें अहवालांतल्यान दिसून येता. तातूंतल्या 1,205 जाणांचेर खून, खून करपाचो यत्न, अपहरण, बायलां आड गुन्यांव अशे गंभीर आरोप आसात.
अहवाला प्रमाण, 54 आमदारांचेर खूनाचे आरोप आसात. जाल्यार 226 जाणांचेर खून करपाचो यत्न केल्याचो आरोप आसा. हाचे भायर 127 आमदारांचेर बायलां आड गुन्यांव नोंद जाल्यात. तातूंतल्या 13 जाणांचेर बलात्काराचे आरोप आसात.
चंद्रबाबू सगळ्यांत गिरेस्त मुख्यमंत्री, ममता सगळ्यांत गरीब
30 डिसेंबर 2024 दिसा जाहीर केल्ल्या अहवालांत आंध्र प्रदेशाचे मुख्यमंत्री चंद्रबाबू नायडू हे देशांतले सगळ्यांत गिरेस्त मुख्यमंत्री. तांचे कडेन 931 कोटी रुपयां परस चड संपत्ती आसा. तेच बरोबर अस्तंत बंगालची मुख्यमंत्री ममता बॅनर्जी 15 लाखांची संपत्ती आशिल्ली सगळ्यांत गरीब मुख्यमंत्री आसा.
भाजपाक एका वर्सांत 4340.47 कोटी रुपयांची देणगी
एडीआरान 17 फेब्रुवारी 2025 दिसा राष्ट्रीय पक्षांक मेळिल्ल्या देणग्यांचो अहवाल जाहीर केला. अहवाला प्रमाण, 2023-24 अर्थीक वर्सा भाजपाक सगळ्यांत चड 4340.47 कोटी रुपयांची देणगी मेळ्ळ्या. काँग्रेस 1225.12 कोटी रुपया सयत दुसरे सुवातेर आसा.
भाजपान आपल्या वट्ट उत्पन्नांतल्यान 50.96% म्हणल्यार 2211.69 कोटी रुपया खर्च केलो, जाल्यार काँग्रेसीन 83.69% म्हणल्यार 1025.25 कोटी रुपया खर्च केलो.
आपाक 22.68 कोटी रुपया देणगी मेळ्ळी जाल्यार पक्षान ताचे परस चड म्हणल्यार 34.09 कोटी रुपया खर्च केलो. सगल्या पक्षांक मेळिल्ल्या वट्ट देणग्यां मदीं फकत भाजपाक 74.57% देणगी मेळ्ळी. उरिल्ल्या 5 पक्षांक 25.43% देणगी मेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
