भांगरभूंय | प्रतिनिधी
वेपाऱ्यांनी पेड्डेर रस्तो, धुल्ल प्रदुशणाचो केलाे निशेध
फोंडेंः तिस्क-उसगांवच्या मार्केटांत पेड्डेर रस्तो, धुल्ल प्रदुशणाचो निशेध करपा खातीर उसगांवच्या वेपारी संघटणेन 4 मार्चाक तिस्क-उसगांव बाजार बंद करपाचें थारायलां. उदरगती खातीर खणिल्ल्या रस्त्याचेर डांबर घालपा कडेन केल्ली आडनदर आनी ताका लागून जावपी धुल्ल प्रदुशणाची समस्या हाचे कडेन सरकाराचें लक्ष ओडपा खातीर विक्रेते आपलीं दुकानां बंद दवरतले.
वेपारी संघटणेचे बसके उपरांत पत्रकारां कडेन उलयतना ही म्हायती दिली. तिस्क-उसगांवच्या पीडीए मार्केटांत वचपी रस्तो पेड्डेर जाला. 2022 वर्साचे पंचायत वेंचणुके उपरांत ह्या रस्त्याचेर डांबर घालपाची मागणी केल्ली. परतून 2024 वर्सा ही मागणी अधिकाऱ्यां कडेन केल्ली. धुल्ल प्रदुशणाक लागून वेपाऱ्यांक पयलींच अर्थीक लुकसाण जाता.
सगल्याच रस्त्याचो प्रकार वायट जाला आनी तातूंत आनीक एक भर घालपाक उदरगतीच्या कामां खातीर केल्ल्या खण कामाक लागून व्हड प्रमाणांत धुल्लाचें प्रदुशण जावपाक लागलां.
सगले कडेन शिंपडिल्ल्या धुल्लक लागून दुकानांतलो म्हाल इबाडपाक लागला आनी तांकां अर्थीक लुकसाण सोंसचें पडटा. तशेंच ह्या प्रदुशणाक लागून गिरायकांक आनी दुकानदारांक थंडेचो आनी स्वास घेवपाच्या दुयेंसांचो धोको वाडटा.
पीडीए मार्केट रस्तो, अवंती नगर, कसायले वाठारांतल्या रस्त्याचेर सुमार आठ वर्सां पयलीं डांबर घाल्लो. आतां ह्या वाठारांतले सगले भितरले रस्तेय येरादारी खातीर वापरूंक शकनात. दोन चाकी आनी चार चाकी वाहन चलयतना वाहन चालकांक खूब कश्ट करचे पडटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
