भांगरभूंय | प्रतिनिधी
जॉन मॅरी वियानी हो क्रिस्ती धर्माचो एक व्हड भाग्यवंत. 4 ऑगस्ट हो ताचो मरणाचो दीस. संवसारीक पवित्र सभा हो दीस ‘यादनिकी दीस’ म्हूण पाळटा. ते निमतान…
संवसारीक पवित्र सभा दर ऑगस्टाचे चवथेर भाग्यवंत जॉन मॅरी वियानी हांची परब समरंभता. भाग्यवंत वियानी फ्रान्साचो काथॉल्क यादनीक (पाद्री) आशिल्लो. ताणें आपल्या जिवितांत क्रिस्ती समुदायाक आनी भोंवतणच्या लोकाक प्रायश्चीत संस्कारा वरवीं पेखोवणी दिली. तशेंच आंकवार मारीचें देवॉसांव वाडोवन लोकाचें आत्मीक परिवर्तन केल्ल्यान ताका पवित्र सभेन हो मान दिला. 8 मे 1786 दिसा जल्माक आयिल्ल्या भाग्यवंत वियानीक 4 ऑगस्ट 1859 दिसा 73 वर्सांचे पिरायेचेर मरण आयलें. पाप सायब पायस धा हांणीं ताका 8 जानेवारी 1905 दिसा भक्तीवंत म्हूण जाहीर करतना पारोकीयल क्लर्जीचो नमुनो म्हण प्रस्थापीत केलो. जाल्यार पाप सायब पायस इकरा हांणीं 31 मे 1925 दिसा ताचेर ‘भाग्यवंत’ म्हूण म्होर मारली आनी ताका पाद्र विगारांचो पात्रॉन (पॅट्रन) केलो.
यादनीक कोण?
यादनीक आमचे भशेन सामान्य मनीस, पूण ताका इगर्ज मातेन क्रिस्ती धर्माचे पवित्र संस्कार आनी ताची शिकवण दिवंक विंचून काडला. तो देवशास्त्राचें शिकप घेता म्हूण ताका जेझून घडोवन हाडिल्लें मीस भेटोवंक अधिकार दिला. तेच बाराबर मेल्ल्यांक मातयेक लावंक ताका सत्ता दिल्लीं आसा. तो पवित्र सभेच्या वांगड्यांक आपलो हिंड कसो, कसलोच भेदभाव करिनासतना मुखार घेवन वता. मीस भेटयता, संस्कार दिता आनी पवित्र सभेक अधिकारान दिशा दिता, तो यादनीक. क्रिस्ती मनशाचें जिवीत ताचे पसून सुरू जाता आनी ताचे पसूनच काबार जाता. मनशाच्या जिविताचो तो केंद्रबिंदू जावन आसा.
जल्मा सावन मर्णा मेरेन…
मनीस जल्माक येता तेन्ना एक यादनीक ताका बावतिझ्म दिता. तो 7 वर्सांचो जाता तेन्ना ताका कोमुन्यांव आनी 14 वर्सां पिरायेर क्रिझ्म म्हळ्यार थिरावणे संस्कार दिता. हे पवित्र सभेचे प्रवेशी संस्कार दिवन, एक यादनीक ताका आत्मीक नदरेन तिचो मजबूत वांगडी करता. एक यादनीक दर एका क्रिस्तांवाक जेझूची शिकवण आनी तिची समजणी दिता, प्राचीत संस्कार आनी गरज तेन्ना पिडेस्तांची माखणीय दिता. क्रिस्ती समुदाय बांदून हाडचें मुखेल आव्हान तो स्विकारता. तांकां जेझूच्या पावलांनी मुखार व्हरता. लग्न संस्काराचे कबलातीचेर तोच शिक्को मारता. उपरांत तांचीं भुरगीं जातात आनी ही प्रक्रिया चालूच उरता. कोण मरता ताका तो मातयेक लायता. अशे तरेन एक यादनीक आनी सामान्य मनीस बऱ्या आनी वायट घडणुकांत एकामेकांच्या नात्यांत गुंथिल्ले आसतात. एक रांवड जसो सोपून-सोपनां, तसो एक यादनीक क्रिस्ती मनशा पसून कसोच कडेक सरना.
आमची जबाबदारी
एक यादनीक पाद्र कूर वो पाद्र विगार कसो एके इगर्जेंत भितर सरता. ताका थारावीक कार्य दिवन बिस्प सायब (बिशप) धाडटा. तो जायत्या लोकाचें बरेंपण जोडटा. तेन्ना, आपलो नेमिल्लो वेळ सोंपतकच हो यादनीक दुसरे इगर्जेंत वचूंक वता. थोडो लोक चुकिचें पावल मारता. ताका वचपा पासून आडावंक सोदता आनी गरजे भायर संघर्श निर्माण करता. इगर्ज मातेच्या नेमां प्रमाणें यादनिकाच्यान एकेच इगर्जेंत रावूंक जायना. दर एके इगर्जेंत येता तो यादनीक आमचो आनी ताका घेवन मुखार वच्चो निर्धार करप ही आमची जबाबदारी. आनीक एक खाशेलेपण म्हळ्यार, आमचो बिस्प सायब जंय धाडटा आनी जी झुटी दिता, ती तो मानून घेता आनी फुडें वता. हेच खातीर जे इगर्जेंत जो यादनीक येता, ताका लोक स्विकारतात आनी स्विकारचोच पडटा. हाचो अर्थ तो बरो आनी सगळें बरें चलता अशें न्हय, अडचणी आसतात मात प्रजेन आपली जबाबदारी वळखूंक जाय.
सोंपयतना…
यादनीक हो देवाचो म्हणयारो. तो आमच्या गांवांत येता तेन्ना ताका बरो येवकार दिवंया आनी ताच्या सूख- दुख्खांत वांटो घेवंया. आमचे समुदाय, आमची पवित्र सभा मजबूत करूंक तो येता, ताका आधार सहकार्य दिवंया. तो निश्कलंक जेझू आमकां दिता. आमी ताचेर कसलेच आरोप करचे न्हय. सर्गींच्या तारणा खातीर तोच आमकां तयार करता. ब-या वायटाचो फरक दाखोवन हेर जिवीत जियेवंक बिंदू वांट्टा. मनीस कसो तो चुकता जायत, ताचे खातीर आमी देवा कडेन मागूंया. आमच्याच कुटूंबाचो वांगडी कसो ताका आमी घेवंया आनी सगल्या यादनिकांक भाग्यवंत जॉन मॅरी वियानीचे परबे निमतान खुशालभरीत यादनिकी दीस म्हण परबीं भेटोवंया.
–
विन्सी क्वाद्रुश
9822587498
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
