भांगरभूंय | प्रतिनिधी
-गोंय रस्तो सुरक्षा मंचाचे अध्यक्ष दिलीप नायक हांची म्हायती
पणजीः राज्यांत जावपी वाहन अपघात नियंत्रणांत हाडपा खातीर सरकारान जोड राष्ट्रांनी तयार केल्ले 4 ई हें धोरण स्विकारचें. हे धोरण आपणायल्यार रस्तो अपघातांत बळी पडप्यांचो आंकडोय उणो जाल्ल्याचें सिद्ध जालां, अशी म्हायती गोंय रस्तो सुरक्षा मंचचे अध्यक्ष दिलीप नायक हांणी आयज जाल्ले पत्रकार परिशदेंत दिली.
ह्या वेळार संजीव सरदेसाय आनी मंचाचे वांगडी हाजीर आशिल्ले. नायक हांणी फुडें उलयतना सांगलें, फाटलीं कांय वर्सां राज्यांत वाहनांच्या अपघातांचें प्रमाण वाडलां. हाचेर नियंत्रण हाडपाक प्रभावी धोरण राबोवपाची गरज आसा. जोड राष्ट्रांनी तयार केल्लें 4 ई हें धोरण खुबश्या देशांनी स्वीकारलां. मात आमी सेगीत निवेदन दिवन लेगीत सरकारान आजूनय हें धोरण स्विकारूंक ना.
4 ईत एज्युकेशन, इंजिनीअरींग, एन्फोर्समेंट आनी इमर्जन्सी मेडिकल सर्व्हिस हांचो आसपाव आसा. एज्युकेशनांत वाहन चालकांक येरादारीच्या नेमां विशीं योग्य शिक्षण दिवप, इंजिनीअरींगांत योग्य रस्ते, एन्फोर्समेंटांत नेमांची प्रभावी अंमलबजावणी जाल्यार इमर्जन्सी सर्व्हिसींत अपघात जाले उपरांत वेळार वैजकी सैवा मेळप हाचो आसपाव आसा, अशें नायक हांणी फुडें सांगलें.
———–
पयलीं चालकांक योग्य शिक्षण दिवप गरजेचें: संजीव
रस्ते अपघात कमी करपाक पयलीं चालकांक योग्य शिक्षण दिवप गरजेचें. फकत गाडी चलोवपा येता म्हणून तांकांपरवानो दिवचो न्हय. त्या व्यक्तीक येरादारीचे नेम खर आसा? ती व्यक्ती जबाबदार चालक? हाचीय म्हायती घेवप गरजेचें. सगळे येरादारी नेम योग्य तरेन पाळपाक एन्फोर्समेंट वेवस्थाय बरी आसपाक जाय, अशें संजीव सरदेसाय हांणी सांगलें.
अपघात जावचे न्हय म्हणून पयलीं चालकाक येरादारीचें शिक्षण मेळप गरजेचें. सध्या सरकारा वतीन विवीध म्हाविद्यालयांनी येरादारी सुरक्षितताये विशीं जागृताय करतात. थारावीक लेक्चर पुराय केल्ले व्यक्तीकूच वाहन परवान्या खातीर पात्र समजुचें, अशेंय सरदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
