भांगरभूंय | प्रतिनिधी
पणजी : सांत आंद्रे मतदारसंघांतल्या पाळे- शिरदोन गांवांतल्या लोकांनी आमदार विरेश बोरकार हांच्या फुडारपणा खाला जनआंदोलन उबारून नगर नियोजन कायद्याचें वादग्रस्त कलम 39 (ए) मतदारसंघा पुरते फाटीं घेवपाक लायलें. हे फाटभुंयेर 22 मे 2025 ते 19 फेब्रुवारी 2026 ह्या 9 म्हयन्यांच्या काळांत सुमार 13.18 लाख चौखण मिटर जमनीचें रुपांतर केल्ल्याची म्हायती मुखार आयल्या. तातूंत नगर्से- पाळोले गांवांतल्या एकाच सर्व्हे नंबरांतली 4.14 लाख चौखण मिटर जमीन रुपांतरीत केल्या. ते भायर एल्ला, कोरगांव, मांडूर, पार्से, लाटंबार्से, थिवी, सांकवाळ ह्या गांवांतली 50 हजारां परस चड चौखम मिटर जमीन कलम 39 (ए) खाला रुपांतर केल्ल्याची म्हायती मुखार आयल्या.
गोंयांत जमनीचो वापर बदलचे खातीर प्रादेशीक आराखड्याची पुराय प्रक्रिया करपाची गरज आशिल्ली. तातूंत भौशाक हरकती, हरकतींची सुनावणी पुराय करची पडटाली. हाका पळवाट म्हूण गोंय, दमण आनी दीव नगरनियोजन कायद्यांत दुरुस्ती करून 39 (ए) कलम जोडलें. हें कलम 2024 त जाल्ले विधानसभेंत मंजूर केलें. ते उपरांत ताची अंमलबजावणी केली. ह्या कलम 39 (ए) खाला सरकाराक ‘भौशीक हीत’ वा ‘विशेश कारणां खातीर’ हे प्रक्रियेक बायपास करून थेट निर्णय घेवपाक मेकळीक मेळ्ळ्या. ल्हान जमनीचेर घर बांदप वा थळावे उदरगती खातीर लवचिकता दिवप हो मूळ उद्देश आशिल्लो. मात वयल्या कलमाचो दुरुपेग जाता अशें मुखार आयले उपरांत लोकांनी ताका विरोध करून आंदोलन उबारलें.
हाचोच भाग म्हूण गोंयांतले दोंगर कापप आनी बेकायदो बांदकामांक आळाबंद घालपा सयत गोंयचें पर्यावरण आनी संस्कृती सांबाळपा खातीर निवृत्त न्यायाधीश फेर्दीन रिबेलो हांच्या फुडारपणा खाला लोकचळवळ सुरू केल्या. हेच मजगतीं सांत आंद्रे मतदारसंघांतल्या पाळे- शिरदोन गांवांतल्या लोकांनी आमदार विरेश बोरकार हांच्या फुडारपणा खाला जनआंदोलन उबारून वादग्रस्त कलम 39 (ए) रद्द करपाक लायलें. मजगतीं, वादग्रस्त कलम 39 (ए) खाला गोंयांत वयल्या काळांत 168 अर्ज मंजूर केल्यात. तातूंत सुमार 13 लाख 86 हजार 85 चौखण मिटर जमीन रुपांतरीत केल्या. तातूंत सगल्यांत चड नगर्से पाळोसेच्या सर्व्हे नं 285/3, 287/1 आनी 287/2 तली 4 लाख 14 हजार 436 चौखण मिटर जमीन रुपांतरीत केल्या. एल्लाची सर्व्हे नं. 68/1 सींतली 1 लाख 64 हजार 45 चौखण मिटर, कोरगांवची सर्व्हे नं. 237/0 तली 92 हजार 175 चौखण मिटर, मंडूरची सर्व्हे नं. 59/1 ए तली 74 हजार 53 चौखण मिटर, लाटंबार्सेची सर्व्हे नं. 420/0 तली सुमार 70 हजार चौखण मिटर, थिवेची सर्व्हे नं. 501/1 ए तली 52 हजार 900 मिटर, थिवेची सर्व्हे नं. 503/1 ए तली 50 हजार चौखण मिटर जमीन रुपांतरीत केल्या. जाल्यार वेगवेगळे सर्व्हे नंबर मेळून नगर्से- पाळोलेची 4,14,736 चौखण मिटर, एल्लाची 1,68,121 चौखण मिटर, थिवेची 1,02,900 चौखण मिटर, कोरगांवची 93,810 चौखण मिटर, मंडूरची 74,053 चौखण मिटर, पार्सेची 73,129 चौखण मिटर, लाटंबार्सेची 72,155 चौखण मिटर, सांकवाळेची 58,063 चौखण मिटर जमीन रुपांतरीत केल्या. तशेंच हेर 58 गांवांतली वा शारांतली मेळून 168 अर्जां वरवीं 13.86 लाख चौखण मिटर जमीन रुपांतरीत केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
