भांगरभूंय | प्रतिनिधी
विरेश बोरकार : हॉस्पिटलांतल्यान डिस्चार्ज
भांगरभूंय | प्रतिनिधी
पणजी : सांत आंद्रेचे आमदार विरेश बोरकार हांची भलायकी सुदारिल्ल्यान तांकां आयज हॉस्पिटलांतल्यान डिस्चार्ज दिलो. हॉस्पिटलांतल्यान भायर सरले उपरांत तांणी प्रसार माध्यमां कडेन संवाद सादतना खूब आक्रमक भुमिका घेतली. भलायकेक लागून कांय काळ सक्रीय राजकारणा पसून पयस रावचें पडिल्ल्यान हांव थकलां अशें दिसलें आसूं येता. पूण आतां पुराय बळग्यान मैदानार परतून देंवतलों आनी वादग्रस्त कलम ’39-ए’ आड परतून नव्या उर्बेन झूज सुरू करतलो अशें बोरकार हांणी स्पश्ट केलें.
आमदार बोरकार हांणी फुडें म्हणलें, गोंयच्या जमनींची राखण करप हें आमचें सगल्यांत व्हडलें कर्तव्य. टीसीपी कायद्याच्या कलम ‘39-ए’चो उपेग करून सरकार पर्यावरणाचो नाश करता आनी थळाव्यांची जमीन बळकावपाचो यत्न करता. ह्या बेकायदेशीर जमनीच्या रुपांतराक लागून गोंयचें अस्तित्वूच धोक्यांत आयलां. भलायकी इबाडिल्ल्यान फाटले कांय दीस शारिरीक रितीन ह्या लढ्यांत हाजीर रावूंक मेळूंक नाशिल्लें. पूण म्हजे कार्यकर्ते आनी गोंयकार झूज मुखार व्हरताले. आतां भलायकी स्थीर जाल्ल्यान परतून एक फावट रस्त्यार देंवून अन्यायाचो जाब विचारतलों, अशें तांणी सांगलें. आतां ’39-ए’ आड झूज चड खर जातलें. लोक जागृत जाल्यात, देखून हेर आमदारांनी तांकां तेंको दिलो ना, जाल्यार लोक स्वताच तांकां जाब विचारतले. विधानसभेंत हें कलम रद्द जालें ना, जाल्यार ते उपरांत लेगीत झूज चालू उरतलें अशेंय तांणी सांगलें. ह्या वेळार तांणी कलम ‘39-ए’च्या नांवान चालू आशिल्ल्या भ्रश्टाचाराचेर खर टिका केली. हो संघर्श फकत मातये खातीर आनी फुडले पिळगेच्या फुडारा खातीर चालू उरतलो अशेंय तांणी आस्वासन दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
