भांगरभूंय | प्रतिनिधी
पणजी: पुलीस खात्यांतल्या 35 कॉन्स्टेबलांक हवालदार पदार बडटी दिल्या. हे विशींचो आदेश मुख्यालयाचे पुलीस अधिक्षक धर्मेश आंगले हांणी जारी केला.
पुलीस स्थापणूक मंडळाच्या आदेशा प्रमाण पुलीस खात्यांतल्या 35 कॉन्स्टेबलांक हवालदार पदार बडटी दिल्या. तातूंत 22 सामान्य गटांतले जाल्यार 3 अनुसुचीत जाती 10 अनुसुचीत जमातींतल्या कॉन्स्टेबलांचो आस्पाव आसा. पूण पुलीस खात्यांत फाटल्या 25 वर्सां परस चड काळ सेवेंत रुजू आशिल्ले सुमार 250 पुलीस कॉन्स्टेबल अजून बडटीची वाट पळयतात. ह्या कर्मचाऱ्यांक अजून एकाय पदार बडटी दिल्ली ना.
पूण 2006 वर्सा भारतीय राखीव दळांत कॉन्स्टेबलपदार भरती जाल्लो पुलीस उपनिरिक्षकपदार बडटी मेळ्ळी. तशेंच हेर सरकारी खात्यांतल्या कर्मचाऱ्यांक उण्यांत उणें तीन पदार बडटी मेळटा. पूण पुलीस खात्यांतले खूबशे कर्मचारी फाटलीं 25 वर्सां परस चड पयल्या पदाचे बडटे खातीर वाट पळयतात.
हेर खात्यांतल्या पदार बडटी खातीर इत्सूक कर्मचारी नासल्यार वा गरजेची सेवा कालावधीची अट सदळ करून बडट्यो दितात. अशे तरेची वेवस्था करून फाटल्या 25 वर्सां परस चड एकाच पदार कार्यरत आशिल्ल्या पुलीस कॉन्स्टेबलांक बडटी दिवची असो सूर खूबशे कर्मचारी खाजगीत उलयतात.
तशेंच कांय कार्यचाऱ्यांनी बडटी खातीर पुलीस म्हासंचालक तशेंच सरकारा कडेन मागणी केल्या. हाचेर कसलोच उपाय जायनाशिल्ल्यान कांय कर्मचाऱ्यांनी मुंबय उच्च न्यायालयाच्या गोंय खंडपिठांत धांव घेवपाची तयारी सुरू केल्ल्याची म्हायती मुखार आयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
