भांगरभूंय | प्रतिनिधी
नवी दिल्ली, खबरां संस्था ः कोलकातांतल्या आरजी कार मेडिकल कॉलेजींत प्रशिक्षीत दोतोराचेर बलात्कार करुन तिची हत्या केल्ल्यान इंडियन मेडिकल असोसिएशनान (IMA) एक ऑनलायन सर्वेक्षण केलें. हांतूत वांटो घेतिल्ल्या सुमार ३५% बायल दोतोरांनी रातच्या शिफ्टांत (Night Shift) आमकां सुरक्षीतताय दिसना अशें मान्य केलां.
आपूण हँडबॅगांत सदांच फोल्डेबल सुरी आनी मिरसांगेचो स्प्रे दवरता. कारण ड्यूटी रूम काळखांतल्या आनी निर्जन कॉरिडोरांत आसा.
कांय दोतोरांनी आपत्कालीन कक्षांत दुरुपयोग जाल्ल्याची म्हायती दिली. गर्दी आशिल्ल्या आपत्कालीन कक्षांत तांकां खूबदां वायट स्पर्शाचो सामनो करचो पडटा अशेंय एका दोतोरान सांगलें.
ह्या सर्वेक्षणांत 22 राज्यांतल्या दोतोरांचो वांटो
केरळ राज्य युनिटाच्या रिसर्च सेलने हें सर्वेक्षण आयोजीत केल्ले. ताचो अध्यक्ष डॉ. राजीव जयदेवान सांगलें, सुमार 22 राज्यांतल्या दोतोरांनी ह्या सर्वेक्षणांत वांटो घेतिल्लो. ऑनलायन सर्वेक्षण गूगल फॉर्मा वरवीं भारतभरांतल्या सरकारी आनी खाजगी दोतोरांक धाडले. 24 वरांत 3,885 प्रतिक्रिया मेळ्ळ्यो.
रातच्या शिफ्टांत 45 टक्के दोतोरांक ड्यूटी रूम मेळना अशें सर्वेक्षणांतल्यान स्पश्ट जालां. कांय ड्यूटी रूम आसता जंय चड करून गर्दीच आसता. देखून दोतोराक रातच्या वेळार विसव घेवपाक दुसरी रुम सोदची पडटा. कांय ड्यूटी रूमांनी बाथरूमय नासता.
सर्वेक्षणांतल्यान कितें कळ्ळें?
डॉ. जयदेवनान सांगलें, आतां मेरेन सर्वेक्षणांतल्यान जें कितें कळ्ळें तातूंत सुरक्षा कर्मचाऱ्यांचो आंकडो वाडोवप, सीसीटीव्ही कॅमेरे लावप, केंद्रीय सुरक्षा कायदो (सीपीए) चालीक लावप, भेट दिवप्यांचो आंकडो मर्यादीत करप, सुरक्षा वाडोवपा खातीर अलार्म सिस्टम आनी लॉक आशिल्ल्या सुरक्षीत ड्युटी रूम करप हांचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
