भांगरभूंय | प्रतिनिधी
ग्रामसभांनी घेतलो थाराव; लेखीत जापेंत मॉवीन गुदिन्होचें स्पश्टीकरण
पणजी: गोंयांतल्या 191 पंचायती मदल्या 35 पंचायतींचे ग्रामसभेंत कोळसो येरादारीक विरोध करपी, जाल्यार 20 पंचायतींचे ग्रामसभेंत रेल्वे मार्गाच्या दोट्टीकरणाक विरोध करपी थाराव संमत जाल्ल्याचें विधानसभेंतले लेखी प्रस्नाक पंचायत मंत्री मॉवीन गुदिन्हो हांणी दिल्ले जापेंतल्यान उक्तें जालां.
आमदार विजय सरदेसाय हांणी हे विशीं प्रस्न विचारिल्लो. रेल्वे दोट्टीकरण मार्ग, तमनार विद्यूत लायन प्रकल्प आनी म्हामार्ग रुंदीकरण ह्या तीन विशयां वयल्यान गोंयांतलें वातावरण फाटल्या कांय वर्सां सावन तापलां. पर्यावरणा विशीं संबंदीत ह्या तिनूय केंद्रीय प्रकल्पा वयल्यान सत्ताधारी भाजप आनी विरोधी काँग्रेस, गोवा फॉरवर्ड, आप हांचें मदीं विधानसभेंत आनी विधानसभे भायरूय आरोप-प्रत्यारोप जायत आसात. रेल्वे दोट्टीकरण मार्ग फक्त कोळसो येरादारींत वाड करपा खातीरूच करीत आशिल्ल्याचो आरोप विरोधकां कडल्यान सेगीत जायत आसा.
हे फाटभुंयेर, गोंयांतल्या कितल्या ग्रामपंचायतींनी रेल्वे तशेंच रस्त्यां वयल्यान जावपी कोळसो येरादारीक विरोध करपी थाराव संमत केल्यात असो प्रस्न आमदार विजय सरदेसाय हांणी केल्लो. ह्या प्रस्ना वयले जापेंत वट्ट 35 ग्रामपंचायतींचे ग्रामसभेंत कोळसो येरादारीक विरोध करपी थाराव संमत जाल्ल्याचें सांगून मंत्री मॉवीन गुदिन्हो हांणी त्या पंचायतींची वळेरीय सादर केली.
हातूंत बार्देस म्हालांतल्या नादोडें, थिवी, नास्नोळें, फोंडें म्हालांतली पंचवाडी, साश्टींतल्या चिंचोणें, केळशी, कोलवें, कुडटरी, गिरदोली, राशोल, सां जुझे दी आरियाल, सारझोरा, कामुर्ली, नुवें आनी धर्मापूर-शिरली, तिसवाडीतली चिंबल, काणकोणांतल्या आगोंद, खोला, खोतीगांव, गांवडोंगरी, लोलयें-पोळें, पैंगीण आनी श्रीस्थळ, केपेंतल्या असोल्डें, नाकेरी-बेतूल, मुगांवांतल्या कांसावली-आरोशी, कुएली, चिखली, माजोड्डें-उतोड्डें, नागवा आनी वेर्णा ह्या पंचायतींचो आस्पाव आशिल्ल्याचें मंत्री गुदिन्हो हांणी सांगलें.
मजगतीं, रेल्वे मार्ग रुंदीकरणाक बार्देसांतली थिवी, साश्टींतल्या चिंचोणें, केळशी, असोळणें, कोलवें, कुडटरी, गिरदोली, सारझोरा, माकझान, सुरावली, बेतळभाटी, चांदोर, वेळ्ळी आनी धर्मापूर-शिरली, केपेंतल्या नाकेरी-बेतूल आनी शेल्डें, मुरगांवांतल्या कुएली, चिखली, केळशी आनी सांकवाळ ह्या पंचायतींच्या ग्रामसभांनी विरोधी करपी थाराव संमत जाला अशें मंत्री गुदिन्हो हांणी जापेंतल्यान स्पश्ट केलें.
तमनाराक आठ पंचायतींचो ग्रामसभेंत विरोध
तमनार विद्युत वाहिनी प्रकल्पाक आठ पंचायतींच्या ग्रामसभांनी विरोधी करपी थाराव संमत जाला. तातूंत थिवी, धारबांदोडें, शेल्डें, कुएली, चिखली, केळशी, सांकवाळ ह्या पंचायतींचो आस्पाव आसा. जाल्यार म्हामार्ग रुंदीकरणाक फक्त नाकेरी-बेतूल पंचायतीचो ग्रामसभेंत विरोधी करपी थाराव संमत जाला अशें मंत्री मॉवीन गुदिन्हो हांणी जापेंतल्यान स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
