भांगरभूंय | प्रतिनिधी
नवी दिल्ली, खबरां संस्था ः डीएचएफएलचे आदले संचालक धीरज वाधवान हांकां सीबीआयन अटक केल्या. तांचेर 34 हजार कोटी रुपयांची कथित बँक फटवणूक केल्ल्याचो आरोप आसा. अटक केल्या उपरांत तांका काल दिल्लींतल्या खाशेल्या न्यायालयांत हजर केलो. ह्या वेळार न्यायालयान तांका न्यायालयीन बंदखण दिल्ल्याची म्हायती सीबीआय अधिकाऱ्यांनी दिली.
‘द फायनान्शियल एक्सप्रेस’ च्या अहवाला प्रमाण सोमारा सांजवेळार धीरज वाधवन हांका मुंबयच्यान ताब्यांत घेतिल्लो. ते उपरांत काल ता. 14 मे दिल्लींतल्या खाशेल्या न्यायालयांत तांकां हजर केलो. उपरांत न्यायालयान तांकां न्यायालयीन बंदखणीत धाडलो. ह्या प्रकरणांत सीबीआयन 2022 वर्सा तांचेर आरोपपत्र दाखल केल्लें. म्हत्वाचें म्हणल्यार हाचे आदीं तांकां येस बँकेंतल्या भानगड प्रकरणात अटक केल्ली. पूण सध्या ते जामीनाचेर भायर आशिल्ले.
सीबीआयन 2022 वर्सा वट्ट 17 बँकांची 34 हजार रुपयांची फटवणूक केल्ल्याच्या आरोपांत गुन्यांव नोंद केल्लो. 2010 ते 2018 ह्या काळांत डीएचएफएलाक 42,781 कोटी रुपयांची रिणाची सुविधा दिल्ल्याचो आरोप तांचेर आशिल्लो. कपिल वाधवन आनी धीरज वाधवन हांणी एकठांय कट करून मे 2019 सावन रिण पेमेंट डिफॉल्ट करुन 34,615 कोटी रुपयांची फटवणूक केल्ल्याचे सीबीआयन दाखल केल्ल्या आरोपपत्रांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
