भांगरभूंय | प्रतिनिधी
पणजीः गोंयांत 322 कावला अड्डे आसात. हे सगले बेकायदेशीर तांकां कसलीच
परवनागी ना. तशेंच हे कावलां अड्डे उद्देगीक वसणुकेंत व्हरपा खातीर जमीन सोदपाची प्रक्रिया चालू आसा, अशी म्हायती विज्ञान आनी तंत्रगिन्यान मंत्री बाबूश मोन्सेरात हांणी विधानसभेच्या लेखी जापेंत दिल्या.
राज्यांत कितले कावलां अड्डे आसात आनी तातूंतल्या कितले बेकायदेशीर अड्ड्यांचेर कारवाय केल्या असो प्रस्न मुरगांवचे आमदार संकल्प आमोणकार हांणी विचारिल्लो. हाचेर जाप दितना विज्ञान आनी तंत्रगिन्यान मंत्र्यांनी सभाघरांत सांगलें,
गोंय घन कोयर वेवस्थापन म्हामंडळ आनी उत्तर तशेंच दक्षीण गोंय जिल्लोधिकाऱ्यांनी दिल्ले म्हायती प्रमाण गोंयात एकूय कावला अड्डो कायदेशीर पद्धतीन चलोवंक ना. गोंय जमीन महसूल कोड 1968च्या कलम 33 खाला ह्या कावलां अड्ड्यांची तपासणी वळेरी संबंदींत उपजिल्होधिकाऱ्यां कडेन दाखल केल्या. राज्यांत आशिल्ले 322 कावलां अड्ड्यां भितरले 94 कावलां अड्ड्यांची वळेरी गोंय प्रदुशण नियंत्रण म्हामंडळान तयार केल्या आनी तांचेर कारवाये खातीर संबंदीत अधिकारी महसूल, वीज, पुलीस, भलायकी, भौशीक बांदकाम खातें, कामगार खातें आनी जिल्लोधिकाऱ्यांक धाडल्या. उत्तर गोंयांत 118 कावलां अड्डे आसात, जाल्यार दक्षीण गोंयांत 204 अड्डे आसात.
99 कावलां अड्ड्यांचेर कारवाय करपाक प्रदुशण म्हामंडळान निर्देश धाडिल्ले. 25 कावलां अड्डे मुरगांव म्हालांत, 22 अड्डे बार्देस म्हालांत, 2 अड्डे धारबांदोडें म्हालात, केपें म्हालात 4, तिसवाडी म्हालात 7, सांगें म्हालांत 1, फोंडे आनी सत्तरी म्हालांतले दरेकी 2 कावलां अड्ड्यांचो आस्पाव आसा.
हे कावलां अड्डे उदेगींक वसणुकेंत व्हरून ते ट्रेड झोन करपा खातीर जमीन सोदपाचो आनी ती संपादन करून गोंय उद्देगीक उदरगत म्हामंडळाचे सुवादीन करपाची प्रक्रिया गोंय घन कोयर वेवस्थापन म्हामंडळान चालीक लायला. ही सुवात कावलां अड्ड्यांक लिजार दितले. गोंय कोयर पुर्नवापर युनीट नोंदणी धोरण चालीक लागले उपरांत ह्या कावलां अड्ड्यांचे पुर्नवापर युनीट म्हूण नोंद करतले. जमनीचे संपादन आनी ती जमीन उद्देगीक म्हामंडळा कडे दिवपाची प्रक्रिया पुराय जाल्या. हे कावलां अड्डे स्थलांतरीत करपाची प्रक्रिया बेगिनूच चालीक लागतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
