भांगरभूंय | प्रतिनिधी
म्हापशें, प्रतिनिधी ः सनबर्न महोत्सव तीन दिसां खातीर आसचो आनी सरकारान 31 डिसेंबराक हो महोत्सव घडोवन हाडपाचेर बंदी घालची. मनरिजवण, वेवसाय ह्या गजालींचेर मर्यादा आसपाक जाय अशें हळदोणाचे आमदार अॅड. कार्लुस फेरेरा हांणी सांगलें.
पयलीं सनबर्न फेस्टिवल फकत 30 डिसेंबर मेरेन जातालो. अंदूं मात आयोजकांची आस्त आनी उमेद वाडली. सध्या आयोजकांनी 31 तारखेक जावपी कार्यावळीची जायरात आनी तिकीट विकपाचें काम चालूच दवरलां.
हाचे पयलींय असोच प्रकार घडिल्लो. एका मंत्र्यान आयोजकां कडेन निमाण्या खिणाक डिल करुन सनबर्नाक परवानगी दिल्ली. परत अशें जावंक फावना. मुख्यमंत्री डॉ. प्रमोद सावंत आनी पर्यटन मंत्र्यांनी 31 डिसेंबराक सनबर्न जावचो ना हें दिल्लें उतर सरकारान पाळचे अशी मागणी अॅड. फेरेरा हांणी केली.
31 डिसेंबराच्या आदल्या दिसा गोंयांत लोकांची व्हड गर्दी आसता. तशेंच थळावे लोकय नव्या वर्साक येवकार दिवपाक उमेदीन आसात. देखून त्या दिसा सनबर्नाचे आयोजन जाल्यार लोकांक खूब त्रास आनी असुविधा सोंसचे पडटले. हाचे भायर येरादारीची कोंयडी जावन कायदो आनी सुवेवस्थेची समस्याय निर्माण जावंक शकता.
हाचे आदीं केरळांतल्या एका धर्मीक थळार हल्ले जाल्ले. ताची पुनरावृत्ती टाळपाची गरज आसा. कारण हो महोत्सव 31 डिसेंबराक जालो जाल्यार गोंय हे कांय जाणांचे सॉफ्ट टार्गेट जावं येता अशेंय फेरेरा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
