भांगरभूंय | प्रतिनिधी
नोव्हेंबर सावन कर्मचारी भरती आयोगाच्यो जायराती
भांगरभूंय । प्रतिनिधी
पणजी : कर्मचारी भरती आयोगा वरवीं नोव्हेंबर सावन 300 पदां भरपा खातीर पांवड्या पांवड्यान जायराती जारी जातल्यो, अशी म्हायती कर्मचारी भरती आयोगांतल्या गोपां कडल्यान मेळ्ळ्या. पुजा नायक प्रकरणाक लागून सरकारी नोकर भरती परतून चर्चेंत आयल्या. नोकरी दिवपाचें हांयस दाखोवन पुजा नायक हे बायलेन खूब जाणांक तोपी घातल्या. नोकरे खातीर पयशे दिवपाचे प्रकार बंद जावपा खातीर हे फुडें कर्मचाऱ्यांची भरती आयोगा वरवींच जातली, अशें मुख्यमंत्री डॉ. प्रमोद सावंत हांणी स्पश्ट केलां.
अर्ज घेवपा सयत परिक्षेची वेवस्था जावपाक जाय. आसन वेवस्था तशेंच हेर वेवस्थेचो विचार करचो पडटा, अशें आयोगाचे सचीव शशांक ठाकूर हांणी सांगलें. कर्मचारी भरती आयोग कायदो फाटल्या सरकाराच्या काळांत जाल्लो. आयोगाचे अध्यक्ष तशेंच वांगड्यांची नेमणूक जावन 2023 सावन आयोगाचें कामकाज सुरू जालें. आतां मेरेन आयोगा वरवीं कर्मचारी भरतीच्यो तीन जायराती जारी जाल्यात. तिनांतली एक जायरात आयोगान फाटीं घेतल्या. 29 डिसेंबर 2023 ह्या दिसा आयोगान भरतीची पयली जायरात जारी केली. येरादारी खात्यांत नॅटवर्क इंजिनियर (3 पदां), पुलिशेंत लॅबोरेटरी टॅक्निशियन (1 पद), एएसआय (वायरलेस ऑपरेटर 1 पद) भरपा खातीर जायरात आशिल्ली. तशेंच टॅक्निशियन 3 पदां, लायब्ररीयन ग्रेड 1 (8 पदां), लायब्ररीयन ग्रेड 2 (8 पदां), चित्रकला शिक्षक (7 पदां), म्युझियम खात्यांत संरक्षक सहाय्यक (1 पद), कॅप्टन ऑफ पोर्टांत लायट किपर (1 पद) भरपा खातीर ही जायरात आशिल्ली. वट्ट 33 पदां भरपा खातीर ही जायरात आशिल्ली. ह्या पदां खातीर 30 जून 2024 ह्या दिसा परीक्षा जाली. दुसरी जायरात 15 जानेवारी 2024 ह्या दिसा सरकारी शाळांनी 36 शिक्षकांचीं पदां भरपा खातीर जारी जाली. ह्या पदां खातीर 30 जून आनी 28 जुलयाक सीबीटी परिक्षा जाली. ह्या दोनूय जायरातीं खातीर मुलाखती जावन निवड जाल्ल्या उमेदवारांक नेमणूक पत्रां जारी जाल्यात.
राखिवतेची तजवीज नाशिल्ल्यान जायरात फाटीं
तिसरी जायरात 7 मार्च 2024 ह्या दिसा सहाय्यक शिक्षकांचीं 33 पदां भरपा खातीर जारी जाली. शिक्षण खात्यान राखिवतेची तजवीज करूंक नाशिल्ल्यान ही जायरात आयोगान फाटीं घेतली. 26 मार्च 2024 ह्या दिसा ही जायरात फाटीं घेतली. लोकसभा वेंचणुके खातीर उपरांत आचारसंहिता लागू जाली. लोकसभा वेंचणुकेचो निकाल जावन 4 जूनाक निकाल जाहीर जालो. हाचे उपरांत नोकर भरती खातीर जायरात जारी जावंक ना. मजगतीं तरेकवार खात्यांनी कंत्राटी पद्दतीन नोकर भरती करपाची प्रक्रिया सुरू केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
