30 वर्सांच्या काळांत 1377 वागांक मारले
भांगरभूंय | प्रतिनिधी
अवयवांची तस्करी, कांसादोरांच्यो टोळयो वाडल्यो
भांगरभूंय । खबरां संस्था
चंद्रपूरः संवसारभर वागांच्या अवयवांक व्हड मागणी आशिल्ल्यान भारतांत वागाचो कांस करपी टोळयो वाडल्यात. महाराष्ट्रांतल्या चंद्रपूर आनी गडचिरोली जिल्ह्यांत बावरिया टोळयेन हालींच दोन वागांची शिकार केल्ल्याचें उजवाडाक आयलां. ह्या प्रकरणांत 19 जाणांक अटक केल्या.
भारतीय रानांजीव संरक्षण सोसायटीच्या अहवाला प्रमाण 1994 ते 2023 ह्या 30 वर्सांच्या काळांत 1377 वागांची शिकार जाल्या. देखून देशभरांतल्या वागांच्या सुरक्षेचो प्रस्न मुखार आयला.
तेलंगण सावन आसाम, दिल्ली मेरेनच्या दुबावितांक चंद्रपूर- गडचिरोली जिल्ह्यांतल्या शिमे वयल्या वाठारांत वागांक मारिल्ल्यान अटक केल्या. हातूंत निवृत्त रान अधिकारीय आसपावीत आसा. देखून राश्ट्रीय पांवड्यार वागांची शिकार करपी आनी राश्ट्रीय, आंतरराष्ट्रीय पांवड्यार वागांच्या अवयवांची तस्करी करपी टोळयो सक्रीय आसात, हें स्पश्ट जालां.
वागाची शिकार करपी राज्यांनी महाराष्ट्र मध्य प्रदेश, उत्तर प्रदेश, अस्तंत बंगाल, बिहार, आंध्र प्रदेश, कर्नाटक, केरळ, राजस्थान, उत्तराखंड, आसाम ह्या राज्यांचो आस्पाव जाता. चंद्रपूर जिल्ह्याक ‘वागांचें घर’ म्हणून वळखतात. हांगा वागांची संख्या उल्लेखनीय आसा. वागांच्या हाडां भायर पारंपरीक वखदां खातीर आंतरराश्ट्रीय बाजारांत वागांचें चामडें, दावखूल, दांत, नाखटां, केंस अशा अवयवांक मागणी आसा. ते विकून लाखांनी रुपया मेळटात, अशें म्हण्टात.
बावेरिया टोळयेच्या 19 जाणांक अटक
चंद्रपूर- गडचिरोली शिमेचेर वागांची शिकार जाल्ल्यान संयुक्त कारवाय करून बावरिया टोळयेच्या 19 आरोपींक अटक केल्या. तातूंत तेलंगणाच्या करीमनगर, आसामांतल्या गुवाहाटी आनी दिल्लीच्या आरोपींचो आस्पाव आसा. दिल्लींत आदीं अटक केल्लो 81 वर्सां पिरायेचो निवृत्त रान अधिकारी कासादोर टोळयेच्या संपर्कांत आशिल्लो आनी वागांच्या अवयवांचो वेपारुय करतालो. दुबावीत अधिकारी वागांची शिकार आनी वागांच्या कुडीच्या अवयवांचो बेकायदेशीर वेपार नियंत्रीत करता, अशें पुलिसांनी सांगलें.
वाग थंय सुरक्षा जाय
आयज वाग राखीव वाठारा भायर वा संरक्षित वाठारां भायर लेगीत वागांची संख्या वाडत आसा आनी मनशा आडचो तांचो संघर्शूय वाडत आसा. संरक्षित वाठारा परस प्रादेशिक वा रानवटी जनावर वेवस्थापनांत दुबळो आशिल्लो वाठार वागाचे शिकारेक आकर्शीत करपाची शक्यताय आसता. देखून जंय जंय वाग वाडत आसात, थंय रान खात्यान वाग राखीव वाठार, अभयारण्यां सारकिल्या रानवटी जनावरांच्या संरक्षणाचो दर्जो सुदारचो. दर एका वागाची राखण करची, अशें इको प्रो. इन्स्टिट्यूटाचे अध्यक्ष बंडू धोतरे हांणी सांगलें.
वागाचे शिकारेची आंकडेवारी
| वर्स | आंकडो |
|---|---|
| 1995 | 121 |
| 1996 | 52 |
| 1998 | 39 |
| 1999 | 81 |
| 2000 | 52 |
| 2001 | 72 |
| 2002 | 46 |
| 2003 | 38 |
| 2004 | 38 |
| 2005 | 46 |
| 2006 | 37 |
| 2008 | 29 |
| 2009 | 32 |
| 2010 | 30 |
| 2011 | 13 |
| 2012 | 32 |
| 2013 | 43 |
| 2014 | 23 |
| 2015 | 26 |
| 2016 | 50 |
| 2017 | 38 |
| 2018 | 34 |
| 2019 | 38 |
| 2020 | 31 |
| 2021 | 56 |
| 2022 | 39 |
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
