भांगरभूंय | प्रतिनिधी
भांगरभूंय। प्रतिनिधी
केंपेंः 30 नोव्हेंबर मेरेन आंबावली हांगच्या दियॉव फुटबॉल मैदानाचें काम पुराय केलें ना जाल्यार खेळां खात्यार मोर्चा व्हरपाची शिटकावणी केंपेंचो आमदार एल्टन डिकॉस्ता हाणे दिल्या. पांच वर्सां जालीं तरी ह्या मैदानाचे काम जायना हे खातीर ताणे थळाव्या लोकां वांगडा मैदानाची पळोवणी केल्या उपरांत तिडक उक्तायली.
केंपें मतदारसंघात जायते बरे खेळगडे आसा. तांणी आंतरराष्ट्रीय पांवड्यार नामना मेळयल्या. केपें स्पोर्ट्स कॉप्लेक्स आनी अवडें- कोठंबी मैदान सोडल्यार आनीक मैदाना नात. ताका लागून खेळगडे आपल्या खेळाची प्रगती करपाक शकनात अशें ताणे सांगलें. 2018 वर्सा दियॉव मैदानाचे काम सुरू केल्लें. स म्हयन्यांत ते पुराय करपाची मोख दवरल्ली. मता पांच वर्सा उलगलीं तरी हें काम पुराय जायना. आदिवासी कल्याण खात्याच्या निधींतल्यान मैदानाचें काम हातांत घेतिल्लें. खेळां मंत्री गोविंद गावडे कडेन हे खातें आसा. कामां विशीं गोविंद गावडे केप्यांत आय़िल्लो तेन्ना ताका विचारलें तेन्ना ताणे काम पुराय करपाचें उतर दिल्लें. मुख्यमंत्र्यान जनता दरबारांत काम पुराय करपाचें आस्वासन दिल्लें. मात अजून ह्या मैदाना कडेन आडनदर चल्ल्या अशें एल्टन हाणे सांगलें.
केल्ल्या कामाचे पयशे मेळ्ळे नात अशें कंत्राटदार सांगता. सरकार आनी कंत्राटदाराक लागून खेळगड्यांक मात अजून मैदान मेळना. कंत्राटदार केपेंच्या आदल्या आमदाराचो सामको लागींचो आसा. ताकाय मैदानाचें काम पुराय करपाक जमलें ना. फाटल्या देड वर्सांत आपणे तीन फावट मैदानाची पळोवणी केली. आतां 30 नोव्हेंबर मेरेन काम पुराय करपाची मुजत आपूण सरकाराक दिता. काम जालें ना जाल्यार खेळा खात्याचेर मोर्चा व्हरचो पडटलो अशें ताणे सांगलें. 28 ऑगस्टाच्यान काम सुरू करून 30 नोव्हेंबर मेरेन तें पुराय करपाचें उतर कंत्राटदारान दिला अशें जॉन फर्नांडीस हाणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
