भांगरभूंय | प्रतिनिधी
केंद्रीय मुखेल म्हायती आयुक्त हिरालाल सामारीया हांणी उक्तायली खंत
भांगरभूंय । प्रतिनिधी
पणजीः म्हायती हक्क कायदो (आरटीआय़) कांय जाणां खातीर धंदो जाला. 30 टक्के लोक म्हायती हक्काचो गैरवापर करून शोशण करतात. कांय आरटीआय कार्यकर्ते हजारांनी आरटीआय अर्ज करतात आनी सुनावणे वेळार गैरहाजीर रावतात. फक्त 75 टक्के लोक ह्या कायद्याचो योग्य वापर करतात, अशी खंत केंद्रीय मुखेल म्हायती आयुक्त हिरालाल सामारीया हांणी उक्तायली.
केंद्रीय मुखेल म्हायती आयुक्त हिरालाल सामारीया हांचे हस्तुकीं गोंय राज्य म्हायती आयुक्ताचे सुदारीत वॅबसायटीचें उक्तावण जालें. पणजे पाट्यार आयुक्ताचे कचेरेंत जाल्ल्या सुवाळ्यांत राज्य मुखेल म्हायती आयुक्त अरविंद कुमार नायर, राज्य म्हायती आयुक्त आत्माराम बर्वे, मुखेल वेंचणूक अधिकारी रमेश वर्मा आनी हेर मानेस्त हाजीर आशिल्ले.
ह्या वेळार उलयतना केंद्रीय मुखेल म्हायती आयुक्त हिरालाल हांणी आरटीआय कायद्याच्या गैरवापरा विशीं खंत उक्तायली.
सध्या खूबशे आरटीआय कार्यकर्ते जाल्यात. तशेंच हेर लोकू अर्ज करतात. ताका लागून वर्साक एक हजार तरी तांचे अर्ज येतात. हातूंतले 20 ते 30 टक्के लोक ह्या कायद्याचो गैरवापर करून तातूंतल्यान धंदो करपाक सोदतात आनी प्रशासनांतल्या अधिकाऱ्यांचें शोशण करतात. 70 ते 75 टक्के लोकूच ह्या कायद्याचो योग्य वापर करतात, अशें हिरालाल हांणी सांगलें.
कांय जाणांक अर्ज घालपाची संवय जाल्या. जेन्ना ह्या अर्जाचेर सुनावणी जाता तेन्ना हे अर्जदार प्रत्यक्ष सुनावणेक येनात, बाकीचे अधिकारी मात हाजीर आसतात. देखीक एका प्रकरणांत आपणे दिल्ली पुलीस अधिकारी, मनीस हक्क आयोगाचे अधिकारी आनी हेर 100 अधिकाऱ्यांक सुनावणे खातीर आपयल्ले. ते हाजीर रावले पूण जाणें हांचे आड अर्ज केल्लो तो मनीसूच गायब आसलो, अशें हिरालाल हांणी म्हणलें.
आरटीआय कायद्या प्रमाण आमी कोणाचेर अर्ज घालपाक निर्बंध घालपाक शकनात. तांकां जाय ती म्हायती वा आंकडेवारी विचारपा खातीर मेकळीक आसा. ताणें 10 रुपया भरून आपलो अर्ज भरचो. जी कितें म्हायती आमी मागता ती समाजा खातीर उपेगी पडटली काय ताच्या फाटल्यान कसलो बरो वा वायट हेत आसा काय हाचेर विचार करचो, अशीं सुचोवणी हिरालाल हांणी दिली. आमकां 50 लाख आरटीआय अर्ज येतात. केंद्रीय म्हायती अधिकारी आनी राज्य म्हायती अधिकारी वेळ मर्यादे प्रमाण 30 दिसां भितर 97 टक्के आरटीआय अर्ज निकालांत काडटात. तातूंतले 3 ते 2 टक्के अर्ज पयली अपिलीय अधिकारिणी कडेन वतात जाल्यार तातूंतले 1 ते 2 टक्के अर्ज दुसरी अपिलीय अधिकारिणी कडेन वचून निकालांत येतात, अशी म्हायती हिरालाल हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
