भांगरभूंय | प्रतिनिधी
नागरी पुरवण खातें : रेशन कार्ड स्थगीत दवरपाची सुचोवणी
भांगरभूंय । प्रतिनिधी
पणजीः रेशन कार्डाची ई-केव्हायसी करपा खातीर नागरी पुरवण आनी गिरायक वेव्हार खात्यान निमणी मुजत दिल्या. 30 एप्रील मेरेन ई-केव्हायसी प्रक्रिया पुराय करची, ना जाल्यार रेशन कार्ड स्थगीत दवरतले, अशी कळोवणी नागरी पुरवण खात्यान जारी केल्या.
नोव्हेंबर 2024 त नागरी पुरवण खात्यान सुचोवणी काडून 15 दिसां भितर रेशन कार्डा खातीर ई-केव्हायसी करपाची सक्ती केल्ली. जर ही प्रक्रिया केली ना जाल्यार रेशन कार्ड स्थगीत दवरतले, अशें सांगिल्लें. पूण हे प्रक्रियेक प्रतिसाद मेळूंक नाशिल्ल्यान नागरी पुरवण खात्यान उपरांत ही प्रक्रिया पुराय करपा खातीर खूब खेपे मुजत वाड दिली.
आतां खात्यान सुदारीत कळोवणी काडून जाहीर केलां, ज्या रेशन कार्ड लाभार्थ्यांनी अजून ई-केव्हायसी प्रक्रिया पुराय करूंक ना तांणी 30 एप्रील 2025 पयली ती पुराय करची.
ई-केव्हायसी प्रक्रिया पुराय करपा खातीर, आधार कार्ड आनी रेशन कार्डचे फोटो कॉपी सयत तुमच्या संबंदीत सोसायटींत भेट दिवची. दिल्ले तारखेक ई-केव्हायसी पुराय करपाक अपेस आयल्यार रेशन कार्ड स्थगीत दवरतले. अदीक म्हायती खातीर, तुमच्या संबंदीत म्हाल नागरी पुरवण अधिकाऱ्या कडेन संपर्क सादचो, अशें कळोवणेंत म्हटलां.
हे विशीं खात्यान विस्तारान म्हायती दितना सांगलें, जर रेशन कार्डाचेर 4 लाभार्थ्यांचीं नांवां आसात जाल्यार त्या दर लाभार्थ्यांन आपल्या आधार कार्डा सयत सोसायटींत वच्चें. थंय पिओस मशिनाचेर आंखाणो लावन ई-केव्हायसी करून घेवची. ही प्रक्रिया खूब सोंपी आसा आनी एकूच फावट करपाक जाय. रेशन कार्डार आशिल्ल्या नांवाचेर आधार नंबर जुळले उपरांत ई-केव्हायसी प्रक्रिया पुराय जातली. अंदूं जानेवारी मेरेन एनएफएसए खाला येवपी अंत्योदय अन्न येवजण आनी प्रायोरीटी हावस होल्ड कार्डाचे 4,78,305 लाभार्थी आसात. तातूंतले 68.73 टक्के, 3,28,761 लाभार्थ्यांनी ई-केव्हायसी केल्या. जाल्यार गरिबी रेशे वयल्या 5,93,125 मदले 43.5 टक्के म्हणल्यार 2,85,279 लाभार्थ्यांनी ई-केव्हायसी प्रक्रिया पुराय केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
