भांगरभूंय | प्रतिनिधी
फेरबदलाच्यो हालचाली
खात्यांत जातले व्हड बदल
बी. एस. संतोष बेगिनूच गोंयांत
भांगरभूंय । प्रतिनिधी
पणजी : गोविंद गावडे हांकां मंत्रीमंडळांतल्यान काडले उपरांत भाजपांत राज्य मंत्रीमंडळांतल्यो फेरबदलांच्यो हालचाली वाडल्यात. सध्याच्या मंत्रीमंडळांतल्या आनीक उण्यांत उण्या तीन मंत्र्यांक काडपाचो विचार पक्षान चलयला. तांचे सुवातेर मंत्रीमंडळांत येवपा खातीर स आमदार इत्सूक आसात. हे संबंदांत भाजपाचे राष्ट्रीय सरचिटणीस बी. एल. संतोष फुडल्या कांय दिसांनी गोंयांत येतले. विधानसभेच्या पावसाळी अधिवेशना आदींच मंत्रीमंडळ फेरबदला सयत मंत्र्यांच्या खात्यांतूय व्हड बदल जातले, अशी म्हायती सुत्रांनी ‘भांगरभूंय’ कडेन उलयतना दिली.
सध्याचे स्थितींत सभापती रमेश तवडकार, आमदार दिगंबर कामत, संकल्प आमोणकार, डिलायला लोबो, मायकल लोबो हांचे सयत प्रवीण आर्लेकार हे लेगीत मंत्रीमंडळांत येवपा खातीर इत्सूक आसात. पूण मंत्रीमंडळ फेरबदलांत कोणाक काडपाचे आनी कोणाक संद दिवपाची हे विशीं स्पश्टता ना. ताका लागून सध्याच्या मंत्र्यां सयत इत्सुकां मदीं धाकधूक लेगीत सुमारा भायर वाडल्या.
फाटले विधानसभा वेंचणुकेच्या निकाला उपरांत काँग्रेसीच्या आठ आमदारांनी भाजपांत प्रवेश करीत सावन गोंय मंत्रीमंडळांतल्या फेरबदलाच्यो चर्चा चालू आसात. तातूंत मुख्यमंत्री डॉ. प्रमोद सावंत आनी भाजपान फक्त एकदांच फाटले लोकसभा वेंचणुके आदीं निलेश काब्राल हाका मंत्रीमंडळांतल्यान काडून ताचे सुवातेर आलेक्स सिक्वेरा हांकां संद दिली. ते उपरांत मंत्रीमंडळ फेरबदलाच्यो चर्चा नेमान जायत रावल्यो आनी मुख्यमंत्री डॉ. सावंत आनी भाजपाचे आदले प्रदेशाध्यक्ष तशेंच राजसभा खासदार सदानंद शेट तानावडे हांणीय तशें स्पश्ट संकेत दिले. मात ते उपरांत लेगीत मंत्रीमंडळांत फेरबदल जावंक नाशिल्ल्यान मंत्रीपदा खातीर इत्सूक आशिल्ल्या आमदारां मदली नाराजी वाडिल्ली.
मंत्रीमडळ फेरबदलाचो विशय साणीर आयिल्लो आसतनाच गोविंद गावडे हांणी कांय दिसा आदीं फर्मागुडी जाल्ले ‘प्रेरणा दीस’ कार्यावळींत मुख्यमंत्री डॉ. सावंत हांचे कडेन आशिल्ल्या आदिवासी कल्याण खात्याच्या कारभाराचेर टिका केल्ली. पणजे श्रमशक्ती भवना खाला फायलींचें ‘दिवप-घेवप’ जाले उपरांत त्यो वयर वतात, असोय आरोप तांणी केल्लो. हाचे वयल्यान सत्ताधाऱ्यांनी मंत्री गावडे हांचेर तशेंच विरोधकांनी सरकाराचेर आरोप करपाक सुरवात केले उपरांत पक्षशिस्त मोडिल्ले खातीर गोविंद गावडे हांचेर कारवाय करपाचे स्पश्ट संकेत मुख्यमंत्री डॉ. सावंत आनी प्रदेशाध्यक्ष दामू नायक हांणी दिल्ले. ते उपरांत कांय दिसा आदींच गोविंद गावडे हांकां मंत्रीपदा वयल्यान देंवयलो. ते उपरांत मुख्यमंत्री डॉ. सावंत आनी पक्षाच्या केंद्रीय नेतृत्वान मंत्रीमंडळ फेरबदलाच्या हालचालींक गती दिल्या. फुडल्या कांय दिसांनी मंत्रीमंडळांत फेरबदला सयत मंत्र्यांच्या खात्यांतूय व्हड बदल करपाचे तांणी निश्चीत केलां, अशेंय सुत्रांनी सांगलें.
वेंचणुको दोळ्यां मुखार दवरून फेरबदल
येता त्या काळांत गोंयांत पणजी मनपा, पालिका, जिल्हो पंचायत आनी ते उपरांत 2027 त विधानसभेची वेंचणूक जातली. ह्या वेंचणुकांनी स्वता जिखपा सयत हेर मतदारसंघांतल्या भाजपा उमेदवारांच्या जैतांत वांटो उखलपाक शकतले, अश्या आमदारांक मंत्रीपदां दिवपाचो विचार पक्षान चलयला. तातूंत कोण मुखार येतलो, हें फुडल्या कांय दिसांनी स्पश्ट जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
