भांगरभूंय | प्रतिनिधी
मुळाव्या सरकारी शाळांचो सर्वे निमाण्या टप्प्यांत
भांगरभूंय I प्रतिनिधी
पणजी : गोंयांतल्या सुमार 294 सरकारी मुळाव्या शाळांनी फक्त एकच शिक्षक कार्यरत आसा. अशा शाळांतल्या विद्यार्थ्यांची संख्याय उणी आसा. ताका लागून त्यो शाळा बंद करपा बदला तांचे लागसारच्या शाळेंत विलिनीकरण करपाचो विचार सरकारान सुरू केला.
विद्यार्थ्यांची फावोशी संख्या नाशिल्ल्यान गांवगिऱ्या वाठारांतल्यो सरकारी मुळाव्यो शाळा बंद पडपाचें सत्र फाटल्या कांय वर्सां पसून सुरू आसा. फाटल्या वर्सा सात मराठी आनी एक कोंकणी मेळून आठ शाळा बंद पडिल्ल्यो. हे फाटभुंयेर अंदूंच्या शिक्षणीक वर्सांत ज्या शाळांनी विद्यार्थी संख्या उणी आसा वा एक शिक्षकी आसात, अशो शाळा लागसारच्या शाळांनी विलीन करपाचे नदरेन सरकाराचे यत्न सुरू आशिल्ले. ते खातीर फाटल्या दोन म्हयन्यां पसून सर्वे सुरू केल्लो. सुमार 294 शाळा एक शिक्षकी आशिल्ल्याचे तशेंच थंय विद्यार्थ्यांची संख्या खूबच उणी आशिल्ल्याचे दिसून आयला. अशो शाळा लागसारच्या शाळांनी विलीन करपाचो विचार सरकारान सुरू केला. फुडल्या कायं दिसांत पालकां कडेन चर्चा करून आनी तांकां विस्वासांत घेवन निमाणो निर्णय घतेले, अशी म्हायती शिक्षण संचालक शैलेश झिंगडे हांणी आमच्या प्रतिनिधी कडेन उलयतना दिली.
अंदूंचे शिक्षणीक वर्स सुरू जावन दोन म्हयने जाले. गांवगिऱ्या वाठारांतल्या कांय सरकारी मुळाव्यो शाळांनी अजून एकूय विद्यार्थी दाखल जावंक ना. कांय शाळांनी विद्यार्थ्यांची संख्या 10 परस उणी आसा. थंय फक्त एकूच शिक्षक आसा. अशा शाळां विशीं ठोस निर्णय घेवपाक शिक्षण खात्यान फाटल्या दोन म्हयन्यां पसून सर्वे सुरू केला. हो सर्वे आतां निमाण्या टप्प्यांत पावला. सर्वे पुराय जाले उपरांत मुख्यमंत्री डॉ. प्रमोद सावंत शिक्षण मंत्री ह्या नात्यान फुडलो निर्णय घेतले.
‘एडीईआय’ कडल्यान शिक्षकांच्याे बसका
एक शिक्षकी तशेंच उणी विद्यार्थी संख्या आशिल्ल्या शाळांचो सर्वे सुरू आसतनाच सगल्याच म्हालांतल्या सहाय्यक जिल्हो शिक्षण निरिक्षकां कडल्यान (एडीईआय) फाटल्या दोन दिसा पसून शिक्षकांच्यो बसका घेवपाचे सत्र सुरू आसा. शिक्षकांनी उणी विद्यार्थी संख्या आशिल्ल्या शाळांतल्या विद्यार्थ्यांच्या पालकांची बसका घेवची. तांचीं मतां जाणून घेवची, अशें निर्देश दिल्यात. ते उपरांतूच शाळांच्या विलिनीकरणा विशीं निर्णय घेतले, अशें शिक्षण संचालक शैलेश झिंगडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
