भांगरभूंय | प्रतिनिधी
भांगरभूंय । प्रतिनिधी
पणजीः गोंयांतल्या विवीध वाठारांनी निकृश्ट दर्ज्याचे रस्ते बांदिल्ल्या सुमार 28 कंत्राटदारांनी संबंदीत रस्ते स्वताच्या खर्चांत नव्यान बांदचे. हो आदेश पाळिनाशिल्ल्या कंत्राटदारांक काळे वळेरेंत घालतले, अशी शिटकावणी भौशीक बांदकाम खात्यान दिल्या. हे संबंदांतलो अहवाल खात्यान हालींच सरकाराक सादर केला.
भौशीक बांदकाम खात्याचे प्रधान मुख्य अभियंता उत्तम पार्सेकार हांणी सोमारा ‘भांगरभूंय’ कडेन उलयतना हे विशींची म्हायती दिली. अंदूं पडिल्ल्या उटंगाराच्या पावसाक लागून राजधानी पणजी सयत गोंयांतल्या विवीध वाठारांतले कांय रस्ते व्हांवून गेले. खूबश्या रस्त्याचेर फोंडकुलां पडून चाळण जाल्या. हे खातीर लोक सरकाराचेर खुबळिल्ले. हे खातीर मुख्यमंत्री डॉ. प्रमोद सावंत हांणी 14 ऑगस्टाक हे संबंदांत भौशीक बांदकाम खात्याच्या अभियंत्यांची बसका घेवन तांकां वडीर काडिल्ले. ज्या कंत्राटदारांनी रस्त्याचें निकृश्ट काम केलां तांकां तत्काळ कारणां दाखयात नोटीस जारी करपाचे निर्देश तांणी बसकेंत दिल्ले. ते प्रमाण त्याच दिसा सांजे वेळार भौशीक बांदकाम खात्यान सुमार 28 कंत्राटदारांक कारणां दाखयात नोटिसो जारी केल्यात.
दिल्ल्या कंत्राटा प्रमाण तुमी रस्तो करूंक ना. खूबश्या वाठारांनी रस्ते पेड्डेर जाल्यात. ते येरादारी खातीर योग्य ना. रस्त्याचें काम निकृश्ट जालां. ताचे वयल्यान प्रवास करतना अपघात जावन तातूंत गाडी चलोवप्याक मरण लेगीत येवपाक शकता. रस्त्याचें काम निकृश्ट दर्ज्याचें केल्ले खातीर तुमचेर कारवाय कित्याक करची न्हय, हाची जाप नोटीस मेळत सावन आठ दिसां भितर मेळप अपेक्षीत आसा. मुजती भितर जाप मेळ्ळी ना जाल्यार तुमी बांदिल्ल्या पेड्डेर रस्त्यां विशीं तुमकां कांयच सांगपाचें ना, अशें समजून करारा प्रमाण तुमचेर योग्य ती कारवाय करतले, अशी शिटकावणी भौशीक बांदकाम खात्यान नोटिशेंतल्यान दिल्ली.
मजगतीं, भौशीक बांदकाम खात्या वतीन गेल्ल्या नोटिशेंक सगळ्याच कंत्राटदारांनी मुजती भितर जापो दिल्यात. ते प्रमाण संबंदीत कंत्राटदारांक तांणी बांदिल्ले आनी पेड्डेर जाल्ले रस्ते स्वताच्या खर्चांतल्यान नव्यान बांदून दिवचे पडटले आनी जे कंत्राटदार हो आदेश पाळचे नात, तांकां काळे वळेरेंत घालपाची शिटकावणी दिल्या, अशें पार्सेकार हांणी स्पश्ट केलें.
‘इंटीग्रेटेड मॅनेजमेंट’ पद्दत लागू जातली!
पावसाचें प्रमाण उणें जाले उपरांत पेड्डेर जाल्ल्या रस्त्यांचीं कामां पुराय करून रस्त्यांचो दर्जो सांबाळचे खातीर ‘इंटीग्रेटेड मॅनेजमेंट’ पद्दत लागू करपाचो विचार सरकारान चलयला. हे संबंदांत मुख्यमंत्री डॉ. प्रमोद सावंत हांणी कांय दिसां आदीं घोशणाय केल्या. कंत्राटदार, ताणें केल्ले रस्ते, डिफेक्ट लायबिलिटीचो काळ हांचो हिशेब आशिल्लो अॅप बेगिनूच तयार करतले. हेर खाती लेगीत हे पद्दती कडेन जोडटले. ताका लागून खंयच्या कंत्राटदारान कितल्या किलोमिटराचो रस्तो, केन्ना केल्लो हाची म्हायती सरकाराक कळपाक मजत जातली. एकादो रस्तो बेगीन पेड्डेर जालो वा ताचेर फोंडकुलां पडली, जाल्यार रस्तो दुरुस्त करपाची जापसालदारकी संबंदीत कंत्राटदाराची आसतली. तशेंच संबंदीत कामा खातीर हे फुडें अभियंत्यांक लेगीत जापसालदार धरून तांचेर कारवाय करतले, अशी म्हायती भौशीक बांदकाम खात्याच्या सुत्रांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
