भांगरभूंय | प्रतिनिधी
शिक्षक भरती उपरांत शाळांचो प्रस्न सुट्टलोः शिक्षण संचालक
पणजी : गोंयांत 27 मुळाव्याे शाळा एक शिक्षकी आसात. तशेंच 48 शाळांनी विद्यार्थ्यांचे तुळेंत 71 शिक्षक चड आसात. मुळाव्या शाळांनी शिक्षकांचो उणाव आसा. म्हालेखापालांच्या अहवालांत ही म्हायती उक्ती जाल्या. नव्यान शिक्षकांची नेमणूक केले उपरांत विद्यार्थी – शिक्षक प्रमाणांतली तफावत पयस जातली. सगल्या शाळांनी शिक्षकांची योग्य पद्दतीन वेवस्था करप शक्य जातले. तशेंच विद्यार्थी आनी शिक्षकांच्या प्रमाणाचो नियाळ घेवन शिक्षकांची लागसारच्या शाळांनी बदली जातली, अशें शिक्षण संचालक शैलेश झिंगडे हांणी सांगलें.
48 शाळांनी विद्यार्थ्यांचे तुळेंत 71 शिक्षक चड आसात. एक शिक्षकी शाळा तशेंच अतिरिक्त शिक्षकांच्या प्रस्नाचेर शिक्षणतज्ञांनी नाराजी उक्तायल्या. शाळा आनी शिक्षकांच्या शिक्षण हक्क कायद्या प्रमाण मुळाव्या शाळांनी शिक्षक आनी विद्यार्थी हांचें प्रमाण निश्चीत आसा. उणे विद्यार्थी आसात, त्या शाळांनी चड शिक्षक. चड विद्यार्थी आसात, त्या शाळांनी उणे शिक्षक, हाचेर प्रशासनाचें लक्ष ना. शिक्षण खात्याचे प्रशासन कितें करता? असो प्रस्न शिक्षणतज्ञ आनी निवृत्त प्राचार्य डॉ. नारायण देसाय हांणी केला.
जूनांत नवे शिक्षणीक वर्स सुरू जालां. विद्यार्थ्यांचो आंकडो दर वर्सा बदलता. ते प्रमाण पळयल्यार शिक्षकांचो उणाव आसा. नव्यान शिक्षकांची भरती जाले उपरांत हो उणाव पयस जातलो, अशें शिक्षण संचालक शैलेश झिंगडे हांणी सांगलें.
गोंयांत 27 मुळाव्यो शाळा शिक्षकी आसात. कांय शाळांनी शिक्षकांचो आंकडो चड आसा, अशें म्हालेखापालाच्या अहवालांत म्हणलां. काय शाळांनी चड शिक्षक आनी कांय शाळांनी उणे शिक्षक, असो शिक्षण खात्याचो घुस्पागोंदळी कारभार आसा.
शिक्षण खात्याची आडनदर : डॉ. नारायण देसाय
कांय शाळांनी चड शिक्षक वा कांय शाळांनी शिक्षकांचो उणाव, हो प्रकार मुळाव्या शिक्षणा खातीर घातक आसा. मुळाव्या शाळेंत 25 विद्यार्थ्यां मेरेन एक शिक्षक अशें प्रमाण आसपाक जाय. शिक्षण हक्क कायद्यान विद्यार्थी – शिक्षक प्रमाण निश्चीत केलां. उणे विद्यार्थी आसले तरी एक शिक्षक चार यत्तांक एकलो शिकोवंक शकना. ते खातीर मुळाव्या शाळांनी दोन तरी शिक्षक आसपाक जाय. शिक्षण खात्याचे दरेकी म्हालात तीन ते चार भागशिक्षणाधिकारी आसतात. विद्यार्थ्यांचो आंकडो विचारांत घेवन शिक्षकांची वेवस्था करपाची गरज आसा. शिक्षण खात्याचे प्रशासन सदोश आसा. हाका लागून विद्यार्थी – शिक्षकांचें प्रमाण सारके ना. तशेंच शाळे खातीर पालक-शिक्षक वेवस्थापन समिती आसता. हे समितीन लेगीत अशा गजालींची फाटपुरवण करपाक जाय. वेवस्थापन समिती आडनदर करता, आनी प्रशासन सारके नाशिल्ल्यान असो घोळ जाता, अशें डॉ. नारायण देसाय हांणी सांगलें.
बदल्यो केल्यार प्रस्न सुटावो जातलो : पी. आर. नाडकर्णी
शाळां कडल्यान योग्य म्हायती घेवन शिक्षकांच्यो बदल्यो केल्यो, जाल्यार हो प्रस्न सुटावो जावप शक्य आसा. काय शिक्षकांक बदल्यो नाका आसता. लागीच तांकां काम जाय. बदली जावची न्हय, म्हूण ते आमदार, मंत्र्यां कडेन संपर्क सादतात. हाका लागून आडखळी येतात. विद्यार्थ्यांचो आंकडो जुलयांत कळटा. आंकडो निश्चीत जाले उपरांत शिक्षकांच्यो बदल्यो केल्यो जाल्यार हो प्रस्न सुटावो जावप शक्य आसा, अशें शालान्त मंडळाचे आदले अध्यक्ष पांडुरंग नाडकर्णी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
