भांगरभूंय | प्रतिनिधी
गोंयांतली 2024 वर्सांतली आंकडेवारी
पणजी: गोंयांत 2024 वर्सा 2,682 अपघातांत 286 जाणांक मरण आयलें. ही आंकडेवारी पळयत जाल्यार फाटल्या वर्साचे तुळेन 5.76 टक्के म्हणल्यार 164 अपघात जाल्यार अपघाती मरणा भितर 1.38 टक्के म्हणल्यार 4 मरणां उणीं जाल्यांत. जाल्यार 2024 वर्सा सगल्यांत चड 72.73 टक्के म्हणल्यार 208 दुचाकी चालक आनी फाटल्यान बशिल्ल्यांक मरण आयलां. तशेंच गोंयांत अपघात आनी मरण येवपाची आंकडेवारी उणीं जायत आसतना दुचाकीचे फाटल्यान बशिल्ल्या 27.27 टक्के (9) जाल्यार हेर वाहन चालकाच्या 13.13 टक्के (2) मरणां भितर वाड जाल्या. ताका लागून हो हुस्क्याचो विशय थारला.
गोंयांतल्या अपघाती मरणांचें प्रमाण उणें करपा खातीर आनी येरादारी नेमांक पाळो दिनाशिल्ल्यांचेर कारवाय करून येरादारींत शिस्त हाडपा खातीर पुलीस खात्यान येरादारी पारेकार (ट्रॅफीक सेंटिनल) ही विशेश गूण पद्दत येवजण 10 नोव्हेंबर 2017 दिसा सावन सुरू केल्ली. ही येवजण उपरांत लोकांच्या विरोधा उपरांत बंद केली.
हाचे बगर शाळा, विद्यालय, म्हाविद्यालय तशेंच हेर शिक्षणीक संस्थांनी अपघात तशेंच येरादारी उल्लंघन नेमां सयत रस्तो सुरक्षेचेर जागृताय करतात. हाचे बगर नेण्ट्यां भुरग्यांक वाहन चलोवपाक दिल्ल्यान पालकांचेर कारवाय करतात. ते खातीर हाचो प्रभाव कांय प्रमाणांत जायत आशिल्ल्याचें दिसून येता.
येरादारी पुलीस विभागाचे आंकडेवारी प्रमाण 2024 वर्सा 2,682 अपघातांत 286 जाणांक मरण आयलां. हातूंत 166 दुचाकी चालकांक मरण आयलां. जाल्यार दुचाकीचे फाटल्यान बशिल्ल्या आनी चलून वचपी दरेकी 42, 17 हेर वाहन चालक, 14 प्रवासी, पांच सायकलकारांचो आस्पाव आसा. जाल्यार 2023 वर्सा 2,846 अपघातांत 290 जाणांक मरण आयिल्लें. तातूंत 176 दुचाकी चालकांक मरण आयिल्लें. उपरांत 44 चलून वचपी, दुचाकीचे फाटल्यान बशिल्ले 33, 15 चालक, 16 प्रवासी, 4 सायकलकार आनी हेर दोगांचो आस्पाव आशिल्लो.
सगल्यांत चड अपघातांत मरण 72.73 टक्के दुचाकी चालक आनी फाटल्यान बशिल्ल्यांक मरण आयिल्लें. तातूंत 166 दुचाकी चालक जाल्यार 42 फाटल्यान बशिल्ल्यांचो आस्पाव आसा. चडशा जाणांनी हॅल्मॅट घालूंक नाशिल्ल्याचें कारण जावंक शकता.
गोंयांत अपघात आनी मरणाची आंकडेवारी उणीं जायत आसतना दुचाकीच्या फाटल्यान बशिल्ले आनी हेर वाहन चालकाच्या मरणां भितर वाड जाल्या. 2023 वर्सा 33 दुचाकीच्या फाटल्यान बशिल्ल्यांक मरण आयिल्लें. जाल्यार 2024 वर्सा 42 जाणांक मरण आयिल्लें. ताका लागून तातूंत 27.27 टक्के म्हणल्यार 9 जाणांचें मरण वाडलें. 2023 वर्सा 15 हेर वाहन चालकांक मरण आयिल्लें. जाल्यार 2024 वर्सा 17 जाणांक मरण आयिल्लें. ताका लागून तातूंत 13.13 टक्के म्हणल्यार 2 जाणांचें मरण वाडलें.
2024 वर्सा गोंयांत 2,682 अपघात जाल्ले. ही अपघाताची सरासरी पळयत जाल्यार, दिसाक 7 अपघात जातात. जाल्यार 286 अपघाती मरण आयिल्लें. ते प्रमाण 30 वरांत एकल्याक मरण येतालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
