भांगरभूंय | प्रतिनिधी
पणजीः गोंयांत 40 टक्के लोक गोडेंमुताच्या सावटा खाला आसात. 26.4 टक्के लोकांक गोडेंमुताचें दुयेंस आसा, जाल्यार 20.3 टक्के गोडेंमुताचे दुयेंती पयल्या पांवड्यार आसात अशी म्हायती गोंय वैजकी म्हाविद्यालयचे एंडोक्रायनोलॉजी विभागाचे मुखेली डॉ. अंकूश देसाय हांणी दिली.
संवसारीक गोडेंमूत दिसा पयली सोमारा भलयाकी संचालनालय, नोवो नॉर्डिस्क इंडिया प्रायव्हेट लिमिटेड आनी नोवो नॉर्डिस्क ग्लोबल बिझनेस सर्व्हिसेस हांणी ‘टूर डी डायबिटीज’ ही सायकल रेली घडोवन हाडली. पयल्या पांवड्या वेल्या गोडेंमुता विशीं जागृताय करपा हेतान ही रेली आयोजीत केल्ली. ते निमतान गोडेंमूत कशें टाळप हे विशीं परिशद घडोवन हाडली. हे परिशदे वेळार डॉ. अंकूश देसाय उलयताले.
ह्या वेळार गोंय भलायकी संचालक डॉ. वंदना धुमे, नोवो नॉर्डिस्क ग्लोबल बिझनेस सर्व्हिसेसचे वेवस्थापकी संचालक जॉन डॉबर, आंतरराष्ट्रीय सायकलस्वार लोगन फिपेन आनी हेर मानेस्त हे परिशदेंत वांटेकार जाल्ले.
हे विशीं उलयतना डॉ. देसाय हांणी सांगलें, गोंयांत गोडेंमुताची समस्या गंभीर आसा. हाचें एक कारण म्हळ्यार लोक गोडेंमूत तपासूंक शुसेगाद रावतात. तपासणी वेळा भितर करिनात.
चडशे लोक जाण्टे जायसर पिरायेच्या 40 वर्साचेर आपलें गोडेंमूत तपासतात. पूण डायबेटीज तपासपाची पिराय 25 वर्सांची. जाण्टेपणांत आपल्याक गोडेंमुताची समस्या जातली हें चिंतपाचें सोडून 25 वर्सा जातकच लोकांनी गोड्यामुताची तपासणी करची. हें दुयेंस केन्नाय जावं येता, अशें डॉ. देसाय हांणी सांगलें.
गोडेंमुता आड लडो दिवपा खातीर गोंय सरकार वचनबध्द आसा. गोडेंमूत हे सायलंट किलर दुयेंस म्हूण वळखतात. हाचे कारण म्हळ्यार ह्या दुयेंसाचीं लक्षणां दिसून येनात आनी आडनदर केल्यार ताचे भलायकीचेर गंभीर परिणाम जावं येता, अशें भलायकी खात्याची संचालक डॉ. वंदना धुमे हांणी सांगलें.
गोंयांत 26 टक्क्या परस चड लोक हें दुयेंस बरोबर घेवन जगतात जी खुबूच गंभीर गजाल आसा. गोंयांत ज्यो सद्याच्यो भलायकी सुविधा आसात ताची उदरगत करप, गोडेंमुता विशीं जागृताय करपाचें काम गोंय सरकार नोवो नॉर्डिस्कच्या मजतीन फाटल्या 15 वर्सा सावन करीत आसा, अशें डॉ. धुमे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
