भांगरभूंय | प्रतिनिधी
केरळांत जावपी 26 व्या अखिल भारतीय साहित्य संमेलना वेळार आपलें कोंकणी साहित्य पुस्तक स्वरुपांत विमोचन करपाची संद अखिल भारतीय कोंकणी परिशदेन दिल्या. 2025 वर्साचें नव्यान प्रकाशीत जाल्लें हें पुस्तक आसूंक जाय. कथा, कविता, निबंध अश्या आनी हेर प्रकारांतलें पुस्तक आसूं येता. संमेलनाक पुस्तक विमोचीत करूंक सोदतल्या लेखनांनी वा प्रकाशकांनी अदीक माहिती खातीर परिशदेची सरकार्यदर्शी स्नेहा सबनीस (9923633789) हांकां संपर्क करचो. 17 नोव्हेंबर 2025 दिसा सांजे 7 वरां मेरेन पुस्तकाची माहिती दिवची. प्रकाशना वेळार लेखका सयत आनीक एकल्याक माचयेर येवपाची मेकळीक आसतली. तशेंच पुस्तकाच्यो 12 प्रती स्नेहा सबनीस हांकां केरळांत संमेलनाचे सुवातेर 22 नोव्हेंबराक सकाळीं 9.00 पयलीं दिवच्यो. पुस्तकाच्यो प्रती आयोजका मेरेन पावोवपाची जबाबदारी लेखकाची आसतली.
मजगतीं, संमेलना खातीर गोंयच्यान सुमार 300 जाणांनी नांव-नोंदणी केल्या. तशेंच कर्नाटक, महाराष्ट्र आनी केरळ ह्या वाठारांतले सुमार 350 प्रतिनिधी ह्या संमेलनांत वांटो घेतले अशें संमेलनाचे कार्याध्यक्ष आनंद कामत हांणी सांगलां.
26वें अखिल भारतीय साहित्य संमेलन 22 आनी 23 नोव्हेंबराक केरळांतल्या कल्लूर-एर्णाकुलमांत ए. जे. हॉलांत जातलें. परिशदेचें आयोजन करपाची जापसालदारकी केरळांतल्या कोंकणी संस्थांनी संयुक्तपणान घेतल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
